Թրամփը հայտարարել է, որ կարող է զանգահարել Պուտինին՝ Ուկրաինայի շուրջ պատերազմը քննարկելու համար

ԱՄՆ նախագահ Դոնալդ Թրամփը հայտարարել է, որ «կարող է» զանգահարել Ռուսաստանի նախագահ Վլադիմիր Պուտինին՝ Ուկրաինայում Ռուսաստանի կողմից պատերազմի ավարտը քննարկելու համար, գրում է CNN-ը։

«Մենք պետք է հանդիպենք։ Նա և ես կհանդիպենք։ Կարծում եմ՝ մենք կլուծենք այդ հարցը։ Բայց եթե մենք չլուծենք այն, դա շատ հետաքրքիր կլինի»,- ասել է Թրամփը Աբու Դաբիից մեկնելիս Air Force One ինքնաթիռում լրագրողների հետ զրույցում։

Այսսօր ավելի վաղ Թրամփը հայտարարել էր, որ նախատեսում է հանդիպել Պուտինի հետ՝ «հենց որ կարողանան կազմակերպել դա»։

Հաղորդվում է նաև, որ Ստամբուլում ԱՄՆ-ը և Ռուսաստանը կարճատև աշխատանքային բանակցություններ են վարել Ռուսաստանի և Ուկրաինայի միջև ուղիղ բանակցություններից առաջ։ Պետքարտուղարության քաղաքականության պլանավորման դեպարտանետի  տնօրեն Մայքլ Անտոնը ՌԴ նախագահի օգնական Վլադիմիր Մեդինսկիի հետ հանդիպել է ընդամենը 15 րոպե։

Կրեմլի մամուլի խոսնակ Դմիտրի Պեսկովն էլ այսօր ասել էր, որ Ռուսաստանի և ԱՄՆ նախագահներ Վլադիմիր Պուտինի ու Դոնալդ Թրամփի միջև շփումները չափազանց կարևոր են ուկրաինական կարգավորման համատեքստում:

«Հանդիպումը պետք է նախապատրաստված և արդյունավետ լինի, քանի որ գագաթնաժողովին նախորդում են փորձագիտական ​​բանակցություններ, խորհրդակցություններ, երկարատև և ինտենսիվ նախապատրաստություն, հատկապես, եթե խոսքը Ռուսաստանի Դաշնության և Ամերիկայի Միացյալ Նահանգների նախագահների հանդիպման մասին է»,- ասել էր Պեսկովը՝ հավելելով, որ նման հանդիպումն անհրաժեշտ է ինչպես երկկողմ ռուս-ամերիկյան հարաբերությունների տեսանկյունից, այնպես էլ միջազգային հարցերի, տարածաշրջանային խնդիրների, այդ թվում՝ Ուկրաինայի շուրջ ճգնաժամի վերաբերյալ բարձրագույն մակարդակով լուրջ զրույցի քննարկման տեսանկյունից։

Թարգմանությունը՝ Էմմա Չոբանյանի