18.12.2025 | 23:24
ՀՀ տարածքում ավտոճանապարհները հիմնականում անցանելի են
Պուտինը Ռուսաստանի դեմ պատժամիջոցներ սահմանողներին «հիմարներ» է անվանել
Քաղաքականություն
13.05.2025 | 20:50
ՌԴ նախագահ Վլադիմիր Պուտինը Մոսկվայի դեմ պատժամիջոցներ սահմանողներին անվանել է «հիմարներ», քանի որ, իր կարծիքով, նրանք վնասում են հենց իրենց։ Այս մասին Ռուսաստանի նախագահն ասել է Կրեմլում «Դելովայա Ռոսիա»-ի ղեկավարների հետ հանդիպման ժամանակ, փոխանցում է Meduza-ն։
Պուտինը նշել է, որ չպետք է «վախենալ» պատժամիջոցներից, քանի որ յուրաքանչյուր ոք, ով «սկսում է վախենալ, անմիջապես կկորցնի ամեն ինչ»։
«Բայց անպայման անհրաժեշտ է հասկանալ, թե ինչ կարող է պատահել։ Պատրաստ եղեք հնարավոր չարամիտների ցանկացած գործողության։ Նրանք շատ բան են անում ի վնաս իրենց։ Թվում է, թե սա անպայման չեն անի, որովհետև դա վնասում է իրենց։ Բայց նրանք դա անում են, հիմարնե՛ր։ Օյ՜, ներողություն եմ խնդրում»,- հայտարարել է ՌԴ նախագահը։
Bloomberg-ն էլ հայտնում է, որ եվրոպացի առաջնորդները կոչ կանեն ԱՄՆ նախագահ Դոնալդ Թրամփին նոր պատժամիջոցներ կիրառել Ռուսաստանի դեմ, եթե Վլադիմիր Պուտինը հրաժարվի մայիսի 15-ին Ստամբուլում Ուկրաինայի նախագահ Վլադիմիր Զելենսկիի հետ հանդիպումից, կամ Մոսկվան չհամաձայնվի անհապաղ և անվերապահ հրադադարի։
Միևնույն ժամանակ, պաշտոնյաների միջև զրույցներում ամերիկյան կողմը հստակ պատասխան չի տվել հարցին՝ արդյո՞ք դեռ պատրաստ է պատժամիջոցներ կիրառել, եթե Ռուսաստանի հարձակումներն Ուկրաինայի վրա շարունակվեն այս շաբաթ, կամ Պուտինը հրաժարվի հանդիպել Զելենսկիի հետ։
Ռուսաստանի նախագահի մամուլի քարտուղար Դմիտրի Պեսկովն էլ ավելի վաղ հայտարարել էր, որ Արևմուտքի կողմից նոր պատժամիջոցների սպառնալիքները չեն վախեցնում Մոսկվային։
Թարգմանությունը՝ Էմմա Չոբանյանի
