09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
ԵՄ դիվանագիտության ղեկավարն ու 35 երկրի պատվիրակություններ ուկրաինական Լվովում են
Քաղաքականություն
09.05.2025 | 15:47
Եվրոպացի նախարարներն ու դիվանագետները մայիսի 9-ին ժամանել են ուկրաինական Լվով։ Պատվիրակության կազմում են 35 երկրների ու Եվրոպայի խորհրդի ներկայացուցիչներ։ Այս մասին հայտնում է ՌԲԿ Ուկրաինան-ն՝ հղում անելով Ուկրաինայի արտաքին գործերի նախարար Անդրեյ Սիբիհային։
Այսօր Լվովում տեղի կունենա երկու կարևոր միջոցառում՝ ԵՄ արտաքին գործերի նախարարների հանդիպումը և Ուկրաինայի դեմ ագրեսիայի հանցագործության համար հատուկ տրիբունալի ստեղծման վերաբերյալ Հիմնական խմբի հանդիպումը։
Եվրոպացի նախարարներից և դիվանագետներից բացի՝ Լվով են ժամանել նաև ԵՄ դիվանագիտության ղեկավար Կայա Կալլասը և Ուկրաինայի վարչապետ Դենիս Շմիգալը։ Այցը սկսվել է Լիչակովի գերեզմանատանը կազմակերպված արարողությամբ՝ ի պատիվ ուկրաինացի հերոսների, որոնք զոհաբերել են իրենց կյանքը՝ պաշտպանելով Ուկրաինան ռուսական ագրեսիայից։
«Այսօր մենք նշում ենք Եվրոպայի օրը Ուկրաինայի և նրա ժողովրդի հետ միասին, որովհետև ընտանիքում ուրախություններն ու դժվարությունները կիսում են բոլորը։ Արտաքին գործերի նախարարների հետ միասին մենք կանգնած ենք Ուկրաինայի կողքին՝ հանուն երկարատև խաղաղության։ Հանուն այն ապագայի, որին մենք հավատում ենք»,- գրել է Կալլասը։
Նախօրեին Կալլասը նշել էր, որ Լվովում կհայտարարի Կիևին պաշտպանության համար ևս 1 միլիարդ եվրո հատկացնելու, ինչպես նաև Ուկրաինայի դեմ ագրեսիայի հանցագործության համար հատուկ տրիբունալ ստեղծելու վերջին քայլի մասին։
«Վաղը մենք կտանք ռազմական հանցագործությունների և ագրեսիայի հանցագործությունների համար տրիբունալի ստեղծման վերջնական քաղաքական հաստատումը»,- ասել էր նա։
Թարգմանությունը՝ Էմմա Չոբանյանի
