Բելառուսի վարչապետն Աղդամում ծանոթացել է «վերակառուցման աշխատանքներին»

Ֆիզուլիի և Աղդամի շրջաններ այցի շրջանակներում Ադրբեջանի վարչապետ Ալի Ասադովը և Բելառուսի վարչապետ Ալեքսանդր Տուրչինը «ծանոթացել են Աղդամի շրջանի Սարըջալը գյուղում ընթացող վերակառուցման աշխատանքներին», հայտնում են ադրբեջանական լրատվականները:

Հաղորդվում է, որ Աղդամի արդյունաբերական պարկին ծանոթանալու ընթացքում Բելառուսի վարչապետը հատուկ տրանսպորտային միջոց է հանձնել վերականգնման, շինարարության և կառավարման ծառայությանը:

Ավելի վաղ, ըստ ադրբեջանական ԶԼՄ-ների, Ալեքսանդր Տուրչինին ընդունել է Ադրբեջանի նախագահ Իլհամ Ալիևը։

«Ադրբեջանի և Բելառուսի միջև հարաբերությունները հիմնված են ամուր բարեկամության և փոխադարձ վստահության վրա», վստահեցրել է Ալիևը, ընդգծելով` Ադրբեջանի և Բելառուսի միջև առկա քաղաքական կապերի ոգուն համապատասխան առևտրատնտեսական հարաբերությունների հետագա զարգացման կարևորությունը։

Հանդիպման ընթացքում տեղի է ունեցել կարծիքների փոխանակում Ադրբեջանի և Բելառուսի միջև առևտրատնտեսական կապերի հետագա ընդլայնման հարցերի վերաբերյալ։ Այս համատեքստում ընդգծվել է Գյանջայի ավտոմեքենաների գործարանում բելառուսական ավտոմեքենաշինական տեխնիկայի արտադրության և Ադրբեջանի տարբեր շրջաններում դրանց սպասարկման կենտրոնների ստեղծման կարևորությունը։ Քննարկվել են Ադրբեջանում վերելակների, կենցաղային տեխնիկայի, գյուղատնտեսական, մասնավորապես՝ անասնապահական, թռչնաբուծական արտադրանքի համատեղ արտադրության կազմակերպման հարցերը։ Միջկառավարական հանձնաժողովին տրվել են համապատասխան հանձնարարականներ նշված ուղղություններով։

Շեշտվել է`«Ադրբեջանի ազատագրված տարածքներում վերականգնողական-շինարարական աշխատանքներին բարեկամ Բելառուսի ընկերությունների մասնակցությունը», նաև քննարկվել է քաղաքաշինության ոլորտում Բելառուսի և Ադրբեջանի միջև փորձի փոխանակման կարևորությունը։