29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Բաքվում շինծու գործերով նիստում Մարտունիի ազատագրման հետ կապված տեսանյութ է ցուցադրվել՝ Սերժ Սարգսյանի, Մովսես Հակոբյանի, Դավիթ Իշխանյանի մասնակցությամբ
Քաղաքականություն
05.05.2025 | 17:53
Բաքվի զինվորական դատարանում այսօր ընթացող Արցախի ղեկավարների և այլ պաշտոնյաների նկատմամբ հարուցված շինծու գործերով դատական նիստում, ադրբեջանական լրատվամիջոցների հաղորդմամբ, ցուցադրվել են տեսանյութեր՝ կապված, իբր, «1992 թվականին Հայաստանի զինված ուժերի կողմից Լաչինի շրջանի օկուպացիայի հետ»։
Դատավարությանը նաև հետազոտվել է, իբր, «Մարտունու շրջանի օկուպացիայի վերաբերյալ տեսանյութ»։ Հաղորդվում է, թե 1993 թվականի ապրիլին հայերի կողմից նկարահանված տեսանյութում Մարտունիում զինծառայողներ են երևում, այդ թվում՝ Մոնթե Մելքոնյանը, Մովսես Հակոբյանը։ նրանց հետ՝ ՀՀ նախկին նախագահ Սերժ Սարգսյանը և Արցախի ԱԺ նախագահ Դավիթ Իշխանյանը։ Տեսանյութում Մոնթե Մելքոնյանը հաշվետվություն է ներկայացնում Սերժ Սարգսյանին, որը, իբր, ասում է. «Մենք հիմա չենք խոսում հրադադարի մասին։ Մենք խոսում ենք հարձակողական գործողությունների և նոր տարածքների գրավման մասին»։
Տեսանյութում նաև երևում է տարածքի զննում, որտեղ Սերժ Սարգսյանը զրուցում է Դավիթ Իշխանյանի հետ։
Դատական նիստում ներկայացված տեսանյութի հիման վրա պետական մեղադրողները հարցեր են ուղղել Արցախի ԱԺ նախագահ Դավիթ Իշխանյանին։ Ըստ ադրբեջանական կողմի տեղեկատվության՝ Իշխանյանը հաստատել է տեսանյութի նկարահանման փաստը և նշել, որ հիշում է Սերժ Սարգսյանի այցի նպատակը։
Դատական նիստը շարունակվում է, այսպես կոչված, «տուժողների հարցաքննությամբ»։
Թարգմանությունը՝ Էմմա Չոբանյանի
