29.04.2026 | 22:21
Պուտինն ու Թրամփը հեռախոսազրույց են ունեցել
Իսպանիայում, Պորտուգալիայում և Ֆրանսիայի որոշ հատվածներում էլեկտրաէներգիայի զանգվածային անջատումներ են
Քաղաքականություն
28.04.2025 | 21:13
Իսպանիայում, Պորտուգալիայում, Ֆրանսիայի և Բելգիայի որոշ հատվածներում էլեկտրաէներգիայի զանգվածային անջատումներ են գրանցվել։ Այս մասին գրում են տեղական լրատվամիջոցները, փոխանցում է Current time-ը։
Խափանումների պատճառը դեռևս պարզ չէ։ El Confidencial-ի փոխանցմամբ՝ մարդիկ տարհանվել են Մադրիդի մետրոյից, իսկ լուսացույցերը դադարել են աշխատել։ Բացի այդ, ամբողջ Իսպանիայում հեռախոսագծերը չեն աշխատում, խափանումներ կան հեռահաղորդակցության օպերատորների և ինտերնետի աշխատանքում։
Հիվանդանոցներն ու օդանավակայանները գործում են գեներատորների շնորհիվ։ Իսպանիայի առողջապահության նախարարությունը շեշտել է, որ հիվանդանոցներն ունեն պահեստային համակարգեր՝ մատակարարումները երաշխավորելու համար, բայց գերատեսչությունը «պատրաստ է ցանկացած միջադեպի»։
«Թերակղզում էլեկտրաէներգիայի անջատումից հետո արդյունաբերական ընկերությունների հետ համատեղ ակտիվացվել են էլեկտրաէներգիայի վերականգնման ծրագրերը։ Պատճառները վերլուծվում են, բոլոր ռեսուրսներն ուղղվում են խնդրի լուծմանը»,- ասվում է Իսպանիայի Red Electrica էլեկտրացանցի հայտարարության մեջ։
Իսպանական Renfe երկաթուղային ընկերությունը հայտարարել է, որ բոլոր գնացքները կանգնեցվել են էլեկտրաէներգիայի անջատումների պատճառով։
Լիսաբոնում էլ դադարեցվել է մետրոյի աշխատանքը, հայտնում է Publico-ն։ Բացի այդ, խափանվել է հեռահաղորդակցության ցանցերի և տրանսպորտի գործունեությունը, բանկոմատները չեն աշխատում։ Լիսաբոնի և Պորտոյի օդանավակայաններն անցել են պահեստային գեներատորների։
Իսպանիայում և Պորտուգալիայում էլեկտրաէներգիայի անջատումներից հետո Ֆրանսիայի որոշ հատվածներում էլ ժամանակավորապես անջատվել է էլեկտրաէներգիան, հայտնել է ֆրանսիական էլեկտրացանցի օպերատոր RTE-ն։ Օպերատորի մամուլի խոսնակը լրացուցիչ մանրամասներ չի հայտնել խափանման մասշտաբների մասին, սակայն նշել է, որ էլեկտրաէներգիան վերականգնվել է կարճատև խափանումից հետո։
Թարգմանությունը՝ Էմմա Չոբանյանի
