Ուկրաինական ԱԹՍ-ները կրկին գրոհել են Շույան, որտեղ գտնվում է Սումիի հարձակմանը մասնակցած ռուսական հրթիռային բրիգադը

ՌԴ Իվանովոյի մարզի իշխանություններն ապրիլի լույս 25-ի գիշերը հայտնել են Շույա քաղաքի վրա ԱԹՍ-երի հարձակման մասին, որտեղ տեղակայված է 112-րդ գվարդիական հրթիռային բրիգադը, որին Ուկրաինայի Պաշտպանության նախարարության գլխավոր հետախուզական վարչության պետ Կիրիլ Բուդանովը մեղադրել էր ապրիլի 13-ին Սումիի վրա հարձակման համար, գրում է Current time-ը։

«Շույա քաղաքում հետ է մղվում անօդաչու թռչող սարքերի հարձակումը։ Հանգստություն պահպանեք, տեղափոխվեք անվտանգ վայր»,- ասվում է Իվանովոյի մարզի կառավարության տելեգրամ ալիքում տարածված հաղորդագրության մեջ։

Astra տելեգրամ ալիքն էլ հաղորդում է, որ Շույայի բնակիչները հայտնում են քաղաքում պայթյունների և ազդանշանների մասին։

Ավելի ուշ Իվանովոյի մարզի իշխանությունները հայտնել են, որ մի քանի ԱԹՍ-ներ են խոցվել։ Դրանց թիվը չի նշվում։

«Շույայում անօդաչու թռչող սարքերի հարձակման վտանգի ռեժիմը պահպանվում է։ Արտակարգ իրավիճակների ծառայությունների մասնագետներն աշխատում են ընկած բեկորների տեղում։ Նախնական տվյալներով՝ զոհեր չկան»,- նշում են տեղի իշխանությունները։

Ռոսավիացիան էլ հայտարարել է Նիժնի Նովգորոդի օդանավակայանի ժամանակավոր փակման մասին։

«Քաղաքացիական ինքնաթիռների թռիչքների անվտանգությունն ապահովելու համար Նիժնի Նովգորոդի օդանավակայանում մտցվել են ինքնաթիռների ժամանման և մեկնման ժամանակավոր սահմանափակումներ»,- հայտնել է գերատեսչության մամուլի ծառայությունը։

Ավելի ուշ օդանավակայանի գործունեության սահմանափակումները վերացվել են։

ՌԴ ՊՆ-ն էլ հայտարարել է, որ գիշերը Ռուսաստանի և Ղրիմի օդային տարածքում խոցվել է ուկրաինական 79 անօդաչու թռչող սարք։ Գերատեսչության տվյալներով՝ բռնակցված Ղրիմի երկնքում խոցվել է 59 անօդաչու թռչող սարք, Սև ծովի վրա՝ 11, Բելգորոդի մարզում՝ 4, Կուրսկի և Նիժնի Նովգորոդի մարզերում՝ 2-ական, իսկ Իվանովոյի մարզում՝ 1 ԱԹՍ։

Հավելենք, որ ուկրաինական անօդաչու թռչող սարքերը վերջին երկու շաբաթվա ընթացքում արդեն երրորդ անգամ են գրոհում Շույան։ Հարձակումները տեղի են ունեցել ապրիլի 16-ին և 17-ին։ Ռուսաստանի զինված ուժերի 112-րդ գվարդիական հրթիռային բրիգադը տեղակայված է Շույա քաղաքում, որը գտնվում է Իվանովոյից 30 կիլոմետր հեռավորության վրա։

Ապրիլի 13-ին Սումիի վրա ռուսական հարձակման հետևանքով զոհվել էր 35, վիրավորվել՝ ավելի քան 100 մարդ։

Թարգմանությունը՝ Էմմա Չոբանյանի