Ուկրաինան կրկին գրոհել է Շույա քաղաքը․ հարված է հասցվել ՌԴ ԶՈւ հրթիռային բրիգադին․ ՏԵՍԱՆՅՈՒԹ

Ուկրաինական անօդաչու թռչող սարքերն ապրիլի լույս 17-ի գիշերը հարձակվել են ՌԴ Իվանովոյի մարզի Շույա քաղաքի վրա։ Տարածաշրջանային օպերատիվ շտաբը հայտնել է, որ «քաղաքում հայտարարվել է անօդաչու թռչող սարքերի հարձակման վտանգի ռեժիմ, գործում է հարձակման մասին նախազգուշացման համակարգ»։ Վարչակազմը հայտնել է, որ հարձակումը հետ է մղվել, ոչ ոք չի տուժել, գրում է Meduza-ն։

Շույայի բնակիչները պայթյունների մասին հայտնել են ժամը 3:50-ի սահմաններում, նշում է Astra տելեգրամյան ալիքը: Տեղի բնակիչները նկարահանել են հարձակման պահը, ինչպես նաև հարվածից հետո բռնկված հրդեհը։ Astra-ն տեղորոշել է ձայնագրություններից մեկը․ ըստ աղբյուրի՝ այն նկարահանվել է Ռուսաստանի ԶՈՒ 112-րդ հրթիռային բրիգադի ռազմավանից 180 մետր հեռավորության վրա։ Տեսանյութերից մեկի հեղինակը պատմել է, որ զորամասում հրդեհ է եղել։

Ռուսաստանի ՊՆ-ն հայտնել է, որ ապրիլի 17-ի գիշերը ռուսական ՀՕՊ համակարգերը երկրի վեց մարզերում խոցել են ուկրաինական 71 անօդաչու թռչող սարք, միաժամանակ, Իվանովոյի մասին գերատեսչությունը ոչինչ չի նշում։

Հավելենք, որ ուկրաինական ԱԹՍ-ները 24 ժամվա ընթացքում արդեն երկրորդ անգամ են հարձակվում Շույայի վրա։ Իշխանությունների տվյալներով՝ երկու մարդ թեթև վնասվածքներ է ստացել։

Ուկրաինայի ՊՆ հետախուզության վարչության պետ Կիրիլ Բուդանովն ավելի վաղ Ռուսաստանի զինված ուժերի 112-րդ հրթիռային բրիգադին մեղադրել էր ապրիլի 13-ին Սումիի վրա հարձակում իրականացնելու մեջ, որի հետևանքով զոհվել էր 35 և վիրավորվել ավելի քան 100 մարդ։

Թարգմանությունը՝ Էմմա Չոբանյանի