24.06.2026 | 18:46
Ավետիք Չալաբյանը երկու ամսով կալանավորվեց
Ուկրաինական ԱԹՍ-ները գրոհել են Շույա քաղաքը․ այստեղ տեղակայված է 112-րդ հրթիռային բրիգադը, որտեղից «Իսկանդեր»-ներ են արձակվել Սումիի ուղղությամբ․ՏԵՍԱՆՅՈՒԹ
Քաղաքականություն
16.04.2025 | 15:39
ՌԴ Իվանովոյի շրջանի Շույա քաղաքը ենթարկվել է անօդաչու թռչող սարքերի հարձակմանը։ Այս քաղաքում է տեղակայված 112-րդ գվարդիական հրթիռային բրիգադը, որն, ըստ Ուկրաինայի պաշտպանության նախարարության գլխավոր հետախուզական վարչության պետ Կիրիլ Բուդանովի, իրականացրել է Սումիի վրա հարձակումը, փոխանցում է Current time-ը։ ՌԴ ՊՆ-ն հայտնել է Իվանովոյի մարզում յոթ անօդաչու թռչող սարքի խոցման մասին։ Mash տելեգրամ ալիքը գրում է, որ հարձակման հետևանքով վնասվել է երեք մասնավոր տուն, իսկ քաղաքի դպրոցներում դասերը չեղարկվել են։
Շույա քաղաքի իշխանությունները փակել են երթևեկությունը Գեներալ Բելովի փողոցի մի հատվածում։ Տարածաշրջանային օպերատիվ շտաբի տվյալներով՝ զոհեր չկան, իսկ երկու թեթև վնասվածքներ ստացած անձինք ստացել են բժշկական օգնություն։
Astra տելեգրամ ալիքն էլ հայտնում է, որ փողոցի փակ հատվածը գտնվում է ռազմական ավանից մեկ կիլոմետրից էլ պակաս հեռավորության վրա։ Ըստ լրատվամիջոցների տեղեկությունների՝ այս ստորաբաժանումը զինված է «Իսկանդեր» օպերատիվ-մարտավարական հրթիռային համակարգերով։
Հիշեցնենք, որ Ռուսաստանը ապրիլի 13-ին Սումիին հարվածելու համար օգտագործել էր նման համալիրից արձակված հրթիռներ, զոհվել էր 35, վիրավորվել՝ ավելի քան 120 մարդ։ Բուդանովը Սումիի վրա հարձակումն իրականացնելու մեջ մեղադրել էր ռուսական բանակի 112-րդ և 448-րդ հրթիռային բրիգադներին։ Մեկ օր առաջ Ուկրաինայի զինված ուժերի գլխավոր շտաբը հայտարարել էր, որ ուկրաինացի զինվորականները հարված են հասցրել 448-րդ բրիգադին։
«Ռուսական յուրաքանչյուր զինվորական ստորաբաժանում և նրա զինծառայողները որոնք հրետակոծում են Ուկրաինայի խաղաղ քաղաքներն ու քաղաքացիներին, կբացահայտվեն և անպայման պատիժ կկրեն»,- ասվում է հայտարարության մեջ։
Թարգմանությունը՝ Էմմա Չոբանյանի
