18.12.2025 | 15:28
Պատրաստ եմ ընդունել իր արժանապատիվ հեռացումը ապահովելու օրակարգով․ Փաշինյանը՝ Գարեգին Բ-ի մասին․ ՏԵՍԱՆՅՈՒԹ
Ալիևի օգնականն Արցախում հայտարարել է՝ «Ադրբեջանը նոր ստատուս քվո է ստեղծում տարածաշրջանում»
18.04.2025 | 14:36
Ադրբեջանը Հարավային Կովկասի տարածաշրջանում նոր ստատուս քվո է ստեղծել։ Այս մասին հայտարարել է Ադրբեջանի նախագահի օգնական Հիքմեթ Հաջիևը էթնիկ զտման ենթարկված Ստեփանակերտում Արցախի պետական համալսարան օտարերկրյա դիվանագիտական կորպուսի ներկայացուցիչների այցի ժամանակ։
Նա հայտարարել է, թե, իբր, Ստեփանակերտը «Ադրբեջանի պատմության հնագույն և նշանակալի բնակավայրերից մեկն է։ Նա հավելել է՝ «այսօր Ադրբեջանը, տարածաշրջանում նոր ստատուս քվո ստեղծելով, կյանքի է վերադարձնում Խանքենդին (Ստեփանակերտ)»։
Հաջիևը խոսել է նաև Բաքվում ապօրինի պահվող հայ գերիների, Արցախի ղեկավարների ու պաշտոնյաների նկատմամբ հարուցված շինծու քրեական գործերով դատավարություններին։
«Ադրբեջանի դեմ կատարված հանցագործությունների, այդ թվում՝ պատերազմական հանցագործությունների և մարդկության դեմ ուղղված հանցագործությունների համար պատասխանատուներն այժմ օրենքի առաջ են կանգնել։ Դատավարություններն Ադրբեջանում շարունակվում են։ Հուսով ենք, որ թափանցիկ և բաց դատական հետաքննությունների արդյունքում արդարությունը կվերականգնվի։ Ադրբեջանը Հարավային Կովկասի տարածաշրջանում ստեղծել է նոր ստատուս քվո՝ հիմնված միջազգային իրավունքի և տարածքային ամբողջականության սկզբունքների վրա»,- ասել է Ալիևի ներկայացուցիչը։
Հավելենք, որ 2023 թվականի սեպտեմբերին Ադրբեջանը ռազմական ագրեսիա իրականացրեց ԼՂ-ի նկատմամբ, որը հանգեցրեց Արցախի հայության բռնի տեղահանմանն ու էթնիկ զտմանը։ Ստեփանակերտի և Արցախի այլ բնակավայրերի հայաթափումից հետո Բաքուն շարունակում է ապօրինի յուրացնել տեղի հայ բնակչության գույքը, ինչպես նաև ավերել հայերին պատկանող տները, շինությունները, պատմամշակությային ժառանգության օբյեկտները։
Թարգմանությունը՝ Էմմա Չոբանյանի
