29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
ՌԴ Գերագույն դատարանը «Թալիբան»-ը հանել է ահաբեկչական կազմակերպությունների ցանկից
Քաղաքականություն
17.04.2025 | 23:29
ՌԴ Գերագույն դատարանը բավարարել է գլխավոր դատախազի՝ աֆղանական «Թալիբան» շարժման գործունեության արգելքը չեղարկելու խնդրանքը, գրում է Meduza-ն։
Որոշումն ուժի մեջ է մտնում անմիջապես, ինչը նշանակում է, որ «Թալիբան»-ը կհանվի ահաբեկչական կազմակերպությունների ցանկից։ Գերագույն դատարանի նիստն անցկացվել է փակ դռների հետևում։
Աֆղանստանում իշխանության եկած «Թալիբան» շարժումը Ռուսաստանում ահաբեկչական կազմակերպություն է ճանաչվել 2003 թվականին՝ այն բանից հետո, երբ ՄԱԿ-ի Անվտանգության խորհուրդն այն ներառել է համապատասխան ցուցակում։ Այս կարգավիճակի վերացման հարցը քննարկվել է նախկինում։ 2020 թվականին Ռուսաստանի նախագահի՝ Աֆղանստանի հարցերով հատուկ ներկայացուցիչ Զամիր Քաբուլովը հայտարարել էր, որ դա կարող է տեղի ունենալ ՄԱԿ-ի Անվտանգության խորհրդի կողմից նմանատիպ որոշում կայացնելուց հետո։
2021 թվականի հոկտեմբերին ՌԴ նախագահ Վլադիմիր Պուտինը հայտարարել էր, որ Մոսկվան «մոտենում է թալիբներին ահաբեկչական կազմակերպությունների ցանկից հանելու որոշման կայացմանը», սակայն այդ որոշումը կրկին պետք է կայացվի ՄԱԿ-ում։ Նա նշել էր, որ Ռուսաստանը «համագործակցում է թալիբների ներկայացուցիչների հետ, հրավիրում է նրանց Մոսկվա և կապի մեջ է նրանց հետ Աֆղանստանում»։
2024 թվականի դեկտեմբերին Պետդուման ընդունել էր օրենք, որը թույլ է տալիս կազմակերպություններին հանել ահաբեկչական կազմակերպությունների ցանկից, այն ստորագրել էր Վլադիմիր Պուտինը։
Փաստաթղթի համաձայն՝ ահաբեկչական կազմակերպության գործունեության արգելքն առաջարկվում է վերացնել դատարանի որոշմամբ՝ գլխավոր դատախազի կամ նրա տեղակալի հայցի հիման վրա։ 2025 թվականի մարտի վերջին Գլխավոր դատախազությունը դիմել էր Գերագույն դատարան՝ խնդրելով կասեցնել «Թալիբան» շարժման գործունեության արգելքը։
Թարգմանությունը՝ Էմմա Չոբանյանի
