17.07.2026 | 11:27
Գազանջատում՝ Հաղարծին բնակավայրի որոշ հասցեներում
Հայաստանը սահմանազատման հետ կապված գրավոր առաջարկներ է փոխանցել Ադրբեջանին
Քաղաքականություն
16.04.2025 | 14:19
Հայաստանը սահմանազատման շարունակության տրամաբանության հետ կապված գրավոր առաջարկներ է փոխանցել Ադրբեջանին, սպասում է արձագանքի:
«Արմենպրես»-ի փոխանցմամբ՝ այս մասին ԱԺ–ում լրագրողների հետ զրույցում հայտարարել է Հայաստանի վարչապետ Նիկոլ Փաշինյանը:
«Մենք սահմանազատման շարունակության տրամաբանության հետ կապված մեր առաջարկությունը գրավոր կերպով փոխանցել ենք Ադրբեջանին և սպասում ենք նրանց արձագանքին: Առաջարկները հետևյալի մասին են, թե ինչ տրամաբանությամբ և որ հատվածում կարող ենք շարունակել»,–ասել է վարչապետը:
Նա հիշեցրել է, որ ընդհանուր համաձայնություն կա սահմանազատումը շարունակել հյուսիսից հարավ: «Հիմա խնդիրն այն է, թե հյուսիսից հարավ ընկած որ հատվածում իրականացնենք: Մենք մեր պատկերացումներն ենք ներկայացրել և սպասում ենք Ադրբեջանի արձագանքին»,-նշել է նա:
Փաշինյանը չի կարծում, թե փակուղային իրավիճակ է՝ վստահեցնելով, որ հետևողականորեն իրականացնելու են սահմանազատումը շարունակելու ուղղությամբ աշխատանքները:
Հայաստանի և Ադրբեջանի միջև պետական սահմանի սահմանազատում իրականացվել է Տավուշի հատվածում՝ մոտ 12 կիլոմետր հատված:
Հայաստանի և Ադրբեջանի սահմանազատման հարցերով հանձնաժողովները հունվարի 16–ին կայացած հանդիպման ընթացքում համաձայնության էին եկել պետական սահմանի սահմանազատման համալիր աշխատանքները շարունակել հյուսիսային հատվածից՝ Հայաստանի Հանրապետության, Ադրբեջանի Հանրապետության և Վրաստանի սահմանների հատման կետից և այնուհետև հարավային ուղղությամբ՝ հյուսիսից հարավ մինչև Հայաստանի Հանրապետության և Ադրբեջանի Հանրապետության սահմանը Իրանի Իսլամական Հանրապետության հետ:
