09.10.2026 | 16:32
Ռուբինյանն ընդունել է Հայաստանում ԵՄ դիտորդական առաքելության ղեկավարին
Բաքուն հայտարարում է՝ եթե ՀՀ-ն չընդունի Ստեփանակերտում մահացած Վերա Աղասյանի մարմինը, հարցը կորոշեն ադրբեջանական պատկան մարմինները
08.04.2025 | 17:19
Եթե Հայաստանը չընդունի Ստեփանակերտում մահացած հայուհի Վերա Աղասյանի մարմինը, ապա հարցը կորոշեն համապատասխան պետական մարմինները։ Այս մասին հայտարարել է Ադրբեջանի Առողջապահության նախարարության դատաբժշկական փորձաքննության և պաթոլոգիական անատոմիայի ասոցիացիայի գլխավոր տնօրեն Ադալյաթ Հասանովը։
«Մահացած հայուհու մարմինը պահվում է ապահով վայրում, որտեղ կան բոլոր անհրաժեշտ պայմանները։ Եթե Հայաստանը չընդունի նրա դին, ապա այդ հարցը կորոշեն համապատասխան պետական մարմինները։ Մահացածների մարմինները պահվում են հատուկ սառնարանային խցերում, որոնք առկա են դիահերձարաններում։ Բայց սառնարաններն ի վիճակի չեն ամբողջությամբ կասեցնել մարմինների քայքայման գործընթացը, դրանք միայն կարողանում են որոշ չափով դանդաղեցնել այն»,- ասել է Հասանովը։
Հիշեցնենք, որ Արցախի հայաթափումից հետո Ստեփանակերտում մնացած 70-ամյա Վերա Աղասյանի մահվան մասին հայտնի էր դարձել նախորդ տարի հոկտեմբերին։ Ըստ ադրբեջանական ԶԼՄ-ների՝ նախնական տվյալներով՝ մահը վրա է հասել սուր սիրտ-անոթային անբավարարության և թոքային զարկերակի թրոմբոզի հետևանքով։
Ավելի վաղ Կարմիր խաչի հայաստանյան գրասենյակի հաղորդակցության ծրագրերի պատասխանատու Զառա Ամատունին Factor.am-ի հետ զրույցում հայտնել էր, որ պատրաստ են աջակցել կնոջ մարմնի տեղափոխմանը, երբ լինի որոշում։
Թարգմանությունը՝ Էմմա Չոբանյանի
