Ադրբեջանում ՀՀ-ի հետ սահմանին ադրբեջանական զորքերի մասին տեղեկություններ հրապարակած ռազմական փորձագետը պայմանական ազատազրկման է դատապարտվել

Ադրբեջանում տեղի է ունեցել պետական ​​գաղտնիք կազմող տեղեկություններ հրապարակելու մեջ մեղադրվող ռազմական փորձագետ Ադալյաթ Վերդիևի քրեական գործով դատավարությունը։ Դատավճիռն այսօր ընթերցվել է Բաքվի Նասիմի շրջանային դատարանում՝ դատավոր Բաբեկ Պանախովի նախագահությամբ։

Դատավճռով նա մեղավոր է ճանաչվել Քրեական օրենսգրքի 284.1 հոդվածով և դատապարտվել 3 տարվա ազատազրկման՝ պետական ​​մարմիններում ղեկավար և պատասխանատու պաշտոններ զբաղեցնելու իրավունքից զրկմամբ, իսկ ՏԻՄ-ում՝ 2 տարի ժամկետով։

Քրեական օրենսգրքի 70-րդ հոդվածի համաձայն՝ պատիժը պայմանականորեն կիրառվել է 1 տարի ժամկետով փորձաշրջանով։

Վերդիևը ձերբակալվել էր անցյալ տարի նոյեմբերին։ Ադրբեջանի Գլխավոր դատախազությունը հայտնել էր, որ 2024 թվականի նոյեմբերի 22-ին Առողջապահության նախարարության «Հանրային առողջության և բարեփոխումների կենտրոնի» քաղաքացիական պաշտպանության շտաբի պետ, Ադրբեջանի զինված ուժերում որպես սպա ծառայած ռազմական փորձագետ Ադալյաթ Վերդիևը լուրջ վնաս է հասցրել երկրի պետական անվտանգությունն ու պաշտպանունակությունն ապահովող շահերին։

Հաղորդվել էր, որ նոյեմբերի 22-ին «ազատագրված տարածքներ» կատարած մեդիա շրջագայության ժամանակ (այց էր կազմակերպվել Տավուշի մարզում ՀՀ-ի հետ սահմանազատված տարածքներ) Վերդիևը նկարահանել և սոցցանցերի իր օգտահաշիվներում հրապարակել էր տեղեկություններ և պատկերներ ադրբեջանական զինուժի մարտական դիրքերի մասին սահմանապահ զորքերի բարձունքներում, տեղակայումներում, կոորդինատներում և մարտական պայմաններում՝ դրանով իսկ առաջացնելով պետական անվտանգության և պաշտպանունակության շահերին հասցված էական վնաս: Նրան մեղադրանք է առաջադրվել քրեական օրենսգրքի 284.1 (պետական գաղտնիքի տարածում) և 308.2 (պաշտոնեական լիազորությունների չարաշահում, որն առաջացրել է ծանր հետևանքներ) հոդվածներով:

Թարգմանությունը՝ Էմմա Չոբանյանի