24.03.2025 | 23:20
Ստեփանծմինդա-Լարս ավտոճանապարհը փակ է բեռնատարների համար
Կրեմլը՝ Պուտին-Էրդողան հնարավոր շփումների մասին
20.03.2025 | 16:25
Ռուսաստանի նախագահ Վլադիմիր Պուտինի այս շաբաթվա գրաֆիկում բարձր մակարդակի շփումներ թուրքական կողմի հետ դեռևս պլանավորված չեն։ Այս մասին հայտարարել է ՌԴ մամուլի խոսնակ Դմիտրի Պեսկովը, գրում է Ինտերֆաքսը։
«Այս շաբաթ ամենաբարձր մակարդակով ծրագրված շփումներ չկան»,- ասել է Պեսկովը լրագրողներին՝ պատասխանելով հարցին՝ արդյո՞ք ՌԴ նախագահը նախատեսում է զրույց ունենալ Թուրքիայի նախագահ Ռեջեփ Թայիփ Էրդողանի հետ՝ հաշվի առնելով թուրքական ԶԼՄ-ների տեղեկություններն այն մասին, որ թուրք առաջնորդը կարող է այս շաբաթ Ռուսաստանի նախագահի հետ քննարկել Ուկրաինայի հակամարտությունը։
Հարցին էլ՝ արդյո՞ք Պուտինի այցը Թուրքիա մնում է օրակարգում, Պեսկովը նշել է, որ հրավերն ուժի մեջ է, սակայն ժամկետները դիվանագիտական ուղիներով դեռևս համաձայնեցված չեն։
«Իսկապես, կա գործող հրավեր Ռուսաստանի նախագահին: Միաժամանակ, այցի ժամկետները դեռևս չեն համաձայնեցվել դիվանագիտական ուղիներով»,- ասել է նա։
Անդրադառնալով Ստամբուլում վերջին իրադարձություններին՝ կապված ընդդիմության զանգվածային ցույցերի հետ, և արդյո՞ք դրանք կարող են առիթ դառնալ Ռուսաստանի Դաշնության և Թուրքիայի ղեկավարների հեռախոսազրույցի համար, Կրեմլի ներկայացուցիչը պատասխանել է. «Ոչ, դա չի կարող և չի լինի հեռախոսազրույցի առիթ։ Դա Թուրքիայի ինքնիշխան գործն է»։
Հիշեցնենք, որ Ստամբուլի քաղաքապետ Էքրեմ Իմամօղլուն ձերբակալվել է ահաբեկչության, կոռուպցիայի և կաշառակերության մեղադրանքների հետաքննության շրջանակում։ Նա համարվում է Թուրքիայի նախագահ Ռեջեփ Թայիփ Էրդողանի գլխավոր մրցակիցը առաջիկա նախագահական ընտրություններում։ Նախօրեին Թուրքիայի տարբեր քաղաքներում հազարավոր մարդիկ էին դուրս եկել բողոքի ակցիաների՝ հաջակցություն Իմամօղլուի։
Թարգմանությունը՝ Էմմա Չոբանյանի
