Քաղաքականություն
18.03.2025 | 17:51
ՌԴ նախագահ Վլադիմիր Պուտինը պահանջում է դադարեցնել զենքի բոլոր մատակարարումները Ուկրաինային՝ ԱՄՆ-ի առաջարկած 30-օրյա զինադադարի համար։ Սա հրադադարը ստորագրելու՝ Մոսկվայի պայմանն է, հաղորդում է Bloomberg-ը՝ վկայակոչելով բարձրաստիճան եվրոպացի պաշտոնյային և Պուտինի դիրքորոշմանը ծանոթ երեք ռուսական աղբյուրների, գրում է BBC-ի ռուսական ծառայությունը։
Առավելագույն նպատակը Կիևին սպառազինության բոլոր մատակարարումները դադարեցնելն է, նվազագույն պահանջը՝ դադարեցնել ամերիկյան ռազմական օգնությունը, Մոսկվայում իր զրուցակիցներին է վկայակոչում գործակալությունը։
Ո՛չ Կրեմլը, ո՛չ Սպիտակ տունը Bloomberg-ին չեն մեկնաբանել այս տեղեկությունը։
Հիշեցնենք, որ այսօր սպասվում է ՌԴ-ի և ԱՄՆ-ի նախագահների հեռախոսազրույցը։
Ավելի վաղ Կիևը համաձայնել էր 30-օրյա հրադադարին: Պուտինն իր հերթին ասել էր, որ ՌԴ-ն համաձայն է հրադադարին, սակայն կան նրբություններ։
Եվրոպան չափազանց դժկամությամբ է դիտարկում Կիևին մատակարարումները դադարեցնելու գաղափարը՝ վախենալով, որ Մոսկվան, իր հերթին, կօգտագործի դադարը՝ ռազմաճակատում ուժերը վերադասավորելու և ռեսուրսները համալրելու համար։
Թարգմանությունը՝ Էմմա Չոբանյանի
