15.05.2026 | 10:06
Ադրբեջանով այսօր հացակատիկ կուղարկվի Հայաստան
Փաշինյանը հայտնել է, որ կմասնակցի Մոսկվայում մայիսի 9-ի միջոցառումներին. Կրեմլ
Քաղաքականություն
14.03.2025 | 17:49
ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի միջև այսօր կայացած հեռախոսազրույցի մասին հաղորդագրություն է տարածել նաև Կրեմլի մամուլի ծառայությունը։ Նշվում է, որ հեռախոսազրույցը տեղի է ունեցել հայկական կողմի նախաձեռնությամբ։
Ըստ ռուսական կողմի՝ Նիկոլ Փաշինյանը հայտնել է Հայաստանի և Ադրբեջանի միջև խաղաղության պայմանագրի տեքստի համաձայնեցման ավարտի և այդ կարևոր փաստաթուղթը ստորագրելու՝ Երևանի պատրաստակամության մասին։
Վլադիմիր Պուտինն այս կապակցությամբ ընդգծել է, որ Ռուսաստանը միշտ աջակցել և շարունակում է աջակցել հայ-ադրբեջանական հարաբերությունների կարգավորմանը՝ ի շահ Անդրկովկասյան տարածաշրջանում անվտանգության, կայունության և սոցիալ-տնտեսական զարգացման։ Այդ նպատակներին հասնելու համար և՛ Հայաստանը, և՛ Ադրբեջանը միշտ կարող են հույս դնել ռուսական կողմի ցանկացած հնարավոր օգնության վրա։
Անդրադարձ է կատարվել նաև ռուս-հայկական փոխշահավետ հարաբերությունների հետագա զարգացման որոշ հարցերի։
Ըստ ռուսական կողմի՝ Հայաստանի վարչապետը հաստատել է, որ ընդունում է ՌԴ նախագահի հրավերն ու մասնակցելու է մայիսի 9-ին Մոսկվայում նախանշված Հայրենական մեծ պատերազմում տարած հաղթանակի 80-ամյակի հոբելյանական տոնակատարություններին։
Վարչապետ Նիկոլ Փաշինյանի աշխատակազմի տեղեկատվության և լրատվության վարչությունից ո՛չ հերքեցին, ո՛չ հաստատեցին Փաշինյանի՝ Մոսկվա մեկնելու պայմանավորվածության մասին տեղեկությունը։ Տեղեկատվության և լրատվության վարչության պետ Արմեն Խաչատրյանը նշեց, որ այս պահին նման տեղեկություն չունի։
Էմմա Չոբանյան
