19.02.2026 | 16:48
Հայաստան կժամանի ԵՄ ներքին գործերի և միգրացիայի հարցերով հանձնակատարը
Ռուսական կողմը պնդում է՝ ռուս զինվորները Կուրսկում մտել են Սուջա քաղաքի կենտրոն․ ՏԵՍԱՆՅՈՒԹ
Քաղաքականություն
12.03.2025 | 15:34
Ռուսական կողմը պնդում է, որ ռուս զինվորականները մտել են Կուրսկի շրջանի Սուջա քաղաքի կենտրոն։ Տեղից կադրեր է հրապարակել ռուսական պետական ՏԱՍՍ գործակալությունը, փոխանցում է Meduza-ն։
Ավելի վաղ նման կադրեր էին հրապարակել ռուս ռազմական լրագրողները։ Եվգենի Պոդդուբնին գրել է, որ քաղաքի կենտրոնում դրոշները բարձրացրել են 11-րդ բրիգադի դեսանտայինները և 2-րդ բրիգադի հատուկ ջոկատայինները։ Միևնույն ժամանակ, ըստ Պոդդուբնիի, դրոշի տեղադրման պահին Ուկրաինայի զինված ուժերի «դիմադրությունը» շարունակվել է։
«Агентство»-էլ նշում է, որ կադրերում հրապարակի վրա սալիկների նախշը համընկնում է Սուջայի քաղաքային վարչության շենքի մոտ գտնվող Սովետսկայա հրապարակի տեսարանին։ Այնուամենայնիվ, անհնար է ճշգրիտ որոշել, թե երբ են արվել կադրերը։
ՌԴ ՊՆ-ն էլ հայտնում է, որ «Հյուսիս» զորախմբի ստորաբաժանումները Ռուսաստանի վերահսկողության տակ են վերադարձրել Կուրսկի շրջանի Կազաչյա Լոկնյա, 1-ին Կնյաժիյ, 2-րդ Կնյաժիյ, Զամոստյե և Միռնի բնակավայրերը։ Այլ մանրամասներ չեն հաղորդվում։
Տարբեր աղբյուրներից նաև տեղեկություններ են տարածվում, որ ուկրաինացի զինվորականներն աստիճանաբար հեռանում են Կուրսկի շրջանից։
Կուրսկի շրջանում ռուսական բանակի հարձակման մասին հաղորդումները սկսեցին հայտնվել անցյալ շաբաթվա վերջին։ Նախօրեին էլ ՌԴ ՊՆ-ն հայտնել էր Կուրսկի շրջանի 12 բնակավայր վերահսկողության տակ վերցնելու մասին։
Թարգմանությունը՝ Էմմա Չոբանյանի
