22.04.2026 | 23:30
ՀՀ տարածքում ավտոճանապարհները հիմնականում անցանելի են
«Լաթաքիայում հայերը թիրախ չեն, բայց զգուշավոր են և չեն տեղափոխվում տներից»․ մանրամասներ՝ զինված բախումներից
Քաղաքականություն
08.03.2025 | 19:38
Սիրիայի Լաթաքիա նահանգում զինված բախումների այս փուլում հայերը թիրախ չեն, այս մասին Factor.am-ի հետ զրույցում հայտնեց լրագրող Սագօ Արեանը։
«Հայերը զգուշավոր են, չեն տեղափոխվում իրենց բնակության վայրից՝ տներում են։ Հայկական համայնքի դեմ ոչ մի կոնկրետ բան չկա, իրավիճակը կայուն է, բայց զգուշավոր են։ Կրոնական բոլոր արարողությունները հետաձգվել են»,- փոխանցեց նա։
Սագօ Արեանի խոսքով, իր ունեցած տեղեկությունների համաձայն վաղն իրավիճակը աստիճանաբար կկայունանա։
«Ապստամբերը, որոնք ասադյան ռեժիմի անդամ են, շատ թույլ են, մեծ մասը հանձնվել են կառավարական ուժերին։ Իհարկե, տարբեր նահանգներում տարբեր իրավիճակներ են․ Լաթաքիայի շուրջ արյունալի իրավիճակ է»,- մանրամասնեց մեր զրուցակիցը։
Նշենք, որ երեկ Սիրիայի Լաթաքիա նահանգում տեղի ունեցած զինված բախումների հետևանքով զահվել են երկու հայեր՝ հայր և որդի Անտուան և Ֆադի Պուտրոսները։ Նրանց հուղարկավորությունը նախատեսված էր այսօր։
Հիշեցնենք՝ Սիրիայի նախկին նախագահ Բաշար Ասադի կողմնակից ալևիները ապստամբել են Լաթաքիա, Տարտուս և Հոմս նահանգներում։ Զինված բախումների հետևանքով զոհվել է ավելի քան 200 մարդ։
Սիրիայի ալևի համայնքը, որի ներկայացուցիչ է նախկին նախագահ Բաշար Ալ-Ասադը, ապստամբել է Լաթաքիայի և Տարտուսի նահանգներում, որտեղ մարտի 6-ին սկսվել են բախումներ։ Մարտի 8-ի դրությամբ, կառավարական զորքերը և իսլամիստական «Հայաթ Թահրիր աշ-Շամ» (ՀԹՇ) շարժման հետ կապված ոստիկանները զննում են տարածաշրջանի բնակավայրերը՝ փնտրելով ապստամբներին։ Որոնումներն ուղեկցվում են ալևի տղամարդկանց զանգվածային մահապատիժներով, ինչը փաստագրված է տասնյակ տեսանյութերով։
Մանյա Պողոսյան
