Սիրիայի նոր իշխանությունները ճնշում են ալևիների ապստամբությունը․ տարածվում են զանգվածային սպանությունների տեսանյութեր

Սիրիայի նոր իշխանությունները ճնշում են ալևիների նահանգներում բռնկված ապստամբությունը, սոցիալական ցանցերում տարածվում են զանգվածային սպանությունների տեսանյութեր, հայտնում է Мeduza-ն:  Կանայք և երեխաները փորձում են ապաստան գտնել  Լաթաքիայում գտնվող ռուսական բազայում։

Սիրիայի ալևի համայնքը, որի ներկայացուցիչ է նախկին նախագահ Բաշար Ալ-Ասադը, ապստամբել է Լաթաքիայի և Տարտուսի նահանգներում, որտեղ մարտի 6-ին սկսվել են բախումներ։ Մարտի 8-ի դրությամբ, կառավարական զորքերը և իսլամիստական «Հայաթ Թահրիր աշ-Շամ» (ՀԹՇ) շարժման հետ կապված ոստիկանները զննում են տարածաշրջանի բնակավայրերը՝ փնտրելով ապստամբներին։ Որոնումներն ուղեկցվում են տղամարդկանց զանգվածային մահապատիժներով, ինչը փաստագրված է տասնյակ տեսանյութերով։

Ապստամբության ղեկավարումը, ենթադրաբար, գտնվում է Բաշար Ալ-Ասադի նախկին զինվորականների ձեռքում, այդ թվում՝ գեներալ Գիաս Դալայի, ով հայտարարել է «Սիրիայի ազատագրության ռազմական խորհրդի» ստեղծման մասին։ Ալևիները, որոնք պատմականորեն աջակցել են Ասադի ռեժիմին, առաջին անգամ կազմակերպված ռազմական ուժ են ձևավորել՝ ի պատասխան ՀԹՇ-ի կողմից իրականացվող ճնշումների։

Սիրիայի նոր նախագահ Ահմադ աշ-Շարաը մարտի 7-ին ելույթ է ունեցել՝ մեղադրելով «տապալված ռեժիմի խմբավորումներին» բռնության մեջ և խոստացել հետապնդել նրանց։ ՀԹՇ-ն, որը իշխանության է եկել Ասադի տապալումից հետո, փորձում է կանխել ալևիների համախմբումը՝ այն համարելով սպառնալիք իր իշխանությանը։ Այս իրադարձությունները արտացոլում են Սիրիայում շարունակվող ճգնաժամը և էթնիկ-կրոնական լարվածությունը։