30.04.2026 | 15:35
Ռուսական Storm-1516-ը շուրջ 25 անգամ անդրադարձել է ՀՀ-ին ու Փաշինյանին. Bloomberg-ը՝ ՌԴ-ի ապատեղեկատվական արշավի մասին
Մոսկվան դաշնակցային մոտեցում է ակնկալում․ Զախարովան՝ Բաքվի կողմից Sputnik-Ադրբեջանի փակման մասին
Քաղաքականություն
27.02.2025 | 18:40
Մոսկվան ակնկալում է, որ Բաքուն կառաջնորդվի ՌԴ-ի և Ադրբեջանի միջև հարաբերությունների դաշնակցային բնույթով և կառուցողական մոտեցում կցուցաբերի Ադրբեջանում «Россия сегодня» մեդիա խմբի ներկայացուցչության (Sputnik-Ադրբեջան) խնդրի լուծման հետ կապված։ Այս մասին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Ակնկալում ենք կառուցողական արձագանք, հուսով ենք, որ համատեղ ջանքերով կկարողանանք հասնել փոխընդունելի լուծումների։ Մենք ելնում ենք նրանից, որ մեր գործընկերներն իրենց հետագա քայլերում կառաջնորդվեն Ռուսաստանի և Ադրբեջանի միջև հարաբերությունների դաշնակցային բնույթով և զերծ կմնան մեր երկրների ու ժողովուրդների երկկողմ, բազմակողմ կապերին վնասելուց»,- ընդգծել է Զախարովան։
Նա նշել է, որ ադրբեջանական կողմի հետ այդ հարցով գտնվում են շփման մեջ և մեր ադրբեջանցի գործընկերներին են փոխանցել իրենց դիրքորոշումն այդ հարցում, որն իսկապես կարևոր է Մոսկվայի համար։
«Կարծում եմ՝ դա պակաս կարևոր չէ Բաքվի համար»,- նշել է Զախարովան։
Նրա խոսքով՝ ռուսական կողմը «շատ լավ լսում և հասկանում է իր ադրբեջանցի գործընկերների փաստարկները»։
«Այո, օրենքը օրենք է, ոչ ոք չի վիճում, բայց միշտ էլ հնարավոր է գտնել փոխընդունելի լուծումներ, գտնել իրավիճակը կարգավորելու հնարավորություն։ Այստեղ ես որևէ հակասություն չեմ տեսնում օրենքի պահանջների պահպանման և իրավիճակը կարգավորելու համար նորմալ փոխադարձ հարգալից հարաբերությունների միջև»,- ասել է ՌԴ ԱԳՆ պաշտոնական ներկայացուցիչը։
Հիշեցնենք, որ փետրվարի 24-ին Ադրբեջանի ԱԳՆ խոսնակ Այխան Հաջիզադեն հայտարարել էր, որ Ադրբեջանում «Россия Сегодня» մեդիախմբի ներկայացուցչությունը՝ Sputnik-Ադրբեջանը, լուծարվել է։ Ավելի վաղ էլ Բաքվի պահանջով գործունեությունն էր դադարեցրել «Ռուսական տունը»։
Թարգմանությունը՝ Էմմա Չոբանյանի
