19.02.2026 | 23:55
Եպիսկոպոսաց հավաքը հանդես է եկել հայտարարությամբ
Իսրայելն ավիահարվածներ է հասցրել Սիրիայի հարավին
Քաղաքականություն
26.02.2025 | 14:52
Փետրվարի լույս 26-ի գիշերը Իսրայելի ռազմաօդային ուժերը հարվածներ են հասցրել Սիրիայի տարածքին։ Այս մասին հայտնել է Իսրայելի պաշտպանության նախարարությունը՝ նշելով, որ հարձակումներն ուղղված են եղել երկրի հարավում գտնվող ռազմական օբյեկտների, այդ թվում՝ զինյալների շտաբների և զենքի պահեստների դեմ։
«Իսրայելի օդուժը հզոր հարվածներ է հասցնում Սիրիայի հարավին՝ որպես հարավային Սիրիայում խաղաղություն հաստատելու համար մեր սահմանած նոր քաղաքականության մի մաս։ Ուղերձը պարզ է՝ մենք թույլ չենք տա, որ հարավային Սիրիան դառնա հարավային Լիբանան։ Սիրիական ռեժիմի ուժերի և երկրում գործող ահաբեկչական կազմակերպությունների ցանկացած փորձ՝ հաստատվելու Սիրիայի հարավում գտնվող անվտանգության գոտում, կդիմավորվի կրակով»,- ասել է Իսրայելի պաշտպանության նախարար Իսրայել Կացը։
Reuters-ը, վկայակոչելով տեղի բնակիչներին, անվտանգության աղբյուրներին և տեղական Syria TV հեռուստաալիքին, հայտնում է, որ Իսրայելը հարձակվել է Կիսվե քաղաքի վրա, որը գտնվում է երկրի մայրաքաղաք Դամասկոսից 20 կմ հարավ, ինչպես նաև հարավային Դարաա նահանգի վրա։ Քաղաքի վրայով թռչող ինքնաթիռների ձայներ և մի քանի պայթյուններ լսվել են նաև մայրաքաղաք Դամասկոսում։
Սիրիան ավելի վաղ դատապարտել է Իսրայելի բանակի մուտքը երկրի հարավ և պահանջել դուրս բերել այդ զորքերը։ 2024 թվականի դեկտեմբերին՝ Սիրիայում Բաշար Ասադի ռեժիմի տապալումից հետո, իսրայելական ցամաքային ուժերը 1973 թվականի պատերազմից հետո առաջին անգամ բացահայտորեն մտել են Սիրիայի տարածք՝ հատելով ապառազմականացված սահմանային գոտին։
Փետրվարի 23-ին Իսրայելի վարչապետ Բենիամին Նեթանյահուն հայտարարել է, որ իր երկիրը չի հանդուրժի իսլամիստական «Հայաթ Թահրիր ալ-Շամ» խմբավորման ներկայությունը, որը տապալել է Ասադին և նրա հետ առնչվող բոլոր ուժերին Սիրիայի հարավում, և պահանջում է տարածքի ապառազմականացում:
Թարգմանությունը՝ Տաթև Ֆռանգյանի
