14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Զելենսկին պատրաստ է լքել պաշտոնը, եթե Ուկրաինան ԵՄ-ի և ՆԱՏՕ-ի անդամ դառնա
Քաղաքականություն
19.02.2025 | 14:58
Ուկրաինայի նախագահ Վլադիմիր Զելենսկին հայտարարել է, որ պատրաստ է լքել նախագահի պաշտոնը, երբ Ուկրաինայում պատերազմն ավարտվի, և Ուկրաինայի անվտանգության համար համապատասխան երաշխիքներ լինեն։ Ըստ Censor.NET-ի՝ այս մասին Զելենսկին ասել է գերմանական ARD հեռուստաալիքի «Maischberger» թոք-շոուի ընթացքում։
«Հանուն Ուկրաինայում խաղաղության՝ ես պատրաստ եմ անել ամեն ինչ, բառացիորեն ամեն ինչ։ Երկար և հարատև խաղաղության համար։ Որպես մարդ, որպես քաղաքացի, որպես հայր․․․ Ես ոչ մի բանից չեմ կառչում։ Ես Ուկրաինայի նախագահն եմ, քանի որ իմ օգտին քվեարկել է մարդկանց 73 տոկոսը, և այսօր ես Ուկրաինայի նախագահն եմ, քանի որ իմ երկրում ինձ աջակցում է մեծամասնությունը»,- հայտարարել է Զելենսկին՝ պատասխանելով հարցին՝ պատրա՞ստ է լքել պաշտոնը, եթե դա պահանջվի խաղաղության պայմանագրի կնքման համար։
Նա նշել է, որ ինքն Ուկրաինայի հայրենասերն է, ինչպես այն մարդիկ, որոնք այսօր պաշտպանում են երկիրը։ Եվ, բնականաբար, Ռուսաստանը ցանկանում է ազատվել իրենից։ Թերևս՝ ո՛չ ֆիզիկապես, ինչպես փորձեցին պատերազմի սկզբում, այլ քաղաքական առումով, հավելել է Զելենսկին։
«Եթե Ուկրաինան վաղը միանա ԵՄ-ին և ՆԱՏՕ-ին, եթե ռուսական զորքերը դուրս գան, և մենք անվտանգության երաշխիքներ ունենանք, իմ կարիքն այլևս չի լինի։ Այդ դեպքում ես ամեն ինչ արել եմ: Բայց քանի դեռ դա տեղի չի ունեցել, ես կպաշտպանեմ իմ երկիրը»,- հայտարարել է Ուկրաինայի նախագահը:
Թարգմանությունը՝ Տաթև Ֆռանգյանի
