Թուլսի Գաբարդն ընտրվել է ԱՄՆ հետախուզության ղեկավար

Թուլսի Գաբարդը՝ ԱՄՆ նախագահ Դոնալդ Թրամփի կաբինետի ամենահակասական թեկնածուներից մեկը, Սենատում քվեարկության արդյունքում հաստատվել է ազգային հետախուզության տնօրենի պաշտոնում, գրում է BBC-ն։

Նախկին դեմոկրատ կոնգրեսականի թեկնածությանը հանրապետականները հավանություն են տվել ձայների մեծամասնությամբ՝ 52 կողմ 48 դեմ հարաբերակցությամբ։ Սենատի մեծամասնության նախկին առաջնորդ, հանրապետական ​​Միթչ Մաքքոնելը միացել է դեմոկրատներին՝ դեմ քվեարկելով նրա թեկնածությանը:

Գաբարդի առաջադրման գործընթացը բարդ էր, և երբեմն թվում էր, թե նա վտանգում է կորցնել հանրապետականների արժեքավոր ձայները՝ հիմնականում հետախուզական ոլորտում փորձի բացակայության պատճառով:

Այս պաշտոնում՝ Գաբարդը վերահսկելու է 18 հետախուզական գործակալություններ, այդ թվում՝ ԿՀՎ-ն, ՀԴԲ-ն և Ազգային անվտանգության գործակալությունը (NSA) և կառավարելու է ավելի քան 70 միլիարդ դոլարի բյուջե:

Գաբարդը Իրաքի պատերազմի վետերան է: Նա Հավայան կղզիներից Ներկայացուցիչների պալատի անդամ էր և Դեմոկրատական ​​կուսակցության ազգային կոմիտեի փոխնախագահ: Սակայն երկու տարի առաջ Գաբարդը լքել է Դեմոկրատական ​​կուսակցությունը՝ մասամբ Ռուսաստանի հետ պատերազմում Ուկրաինային աջակցելու վերաբերյալ տեսակետների տարբերության պատճառով: Նա քննադատել է Բայդենի վարչակազմին՝ Կիևին ռազմական օգնություն տրամադրելու համար։

Հավելենք, որ 2017 թվականի սեպտեմբերին, դեռևս կոնգրեսական լինելու ընթացքում, Գաբարդը ԱՄՆ օրենսդիրների հետ այցելել է Հայաստան և Արցախ, եղել Ստեփանակերտում ու Շուշիում, հանդիպել Արցախի պաշտոնյաների հետ։ Այս այցը հարուցել էր պաշտոնական Բաքվի դժգոհությունը։ Ադրբեջանի ԱԳՆ-ն «սադրանք» էր անվանել ամերիկացի օրենսդիրների այցը Լեռնային Ղարաբաղ և հայտարարել, որ նրանք ներառվել են սև ցուցակում։

Թարգմանությունը՝ Էմմա Չոբանյանի