Քաղաքականություն
14.11.2024 | 10:46
ԱՄՆ-ի ընտրված նախագահ Դոնալդ Թրամփը չորեքշաբթի ասել է, որ իր համախոհը դարձած նախկին դեմոկրատ կոնգրեսական Թուլսի Գաբարդին, որոշել է նշանակել ազգային հետախուզության տնօրենի պաշտոնում, գրում է CNN-ը։
Գաբարդը, որը բանակի ազգային գվարդիայի վետերան է, 2020 թվականին հայտ էր ներկայացրել դեմոկրատական կուսակցության կողմից նախագահի թեկնածուի մրցապայքարում, սակայն հաջողության չէր հասել։ Դրանից հետո՝ 2022 թվականին, նա հայտարարել էր, որ հեռանում է Դեմոկրատական կուսակցությունից: Նա քարոզարշավ է անցկացրել Թրամփի հետ և ծառայել նրա անցումային թիմում: Գաբարդն օգնել է Թրամփին Քամալա Հարիսի հետ սեպտեմբերի նախընտրական բանավեճին պատրաստվելիս։
«Ես գիտեմ, որ Թուլսին մեր հետախուզական համայնքին կբերի այն անվախ ոգին, որը ցույց է տվել նրա վաստակավոր կարիերան՝ պաշտպանելով մեր սահմանադրական իրավունքները և ապահովելով խաղաղությունը ուժի միջոցով»,- ասել է Թրամփը:
Հավելենք, որ 2017 թվականի սեպտեմբերին, դեռևս կոնգրեսական լինելու ընթացքում, Գաբարդը ԱՄՆ օրենսդիրների հետ այցելել է Հայաստան ու Արցախ, եղել Ստեփանակերտում ու Շուշիում, հանդիպել Արցախի պաշտոնյաների հետ։
Այս այցը հարուցել էր պաշտոնական Բաքվի դժգոհությունը։ Ադրբեջանի ԱԳՆ-ն «սադրանք» էր անվանել ամերիկացի օրենսդիրների այցը Լեռնային Ղարաբաղ և հայտարարել, որ նրանք ներառվել են սև ցուցակում։
«Փալոնը, Վալադաոն և Գաբարդն անօրինական այց են կատարել օկուպացված ադրբեջանական տարածքներ՝ խախտելով ադրբեջանական օրենսդրությունը։ Երեքն էլ ավելացվել են Ադրբեջանում անցանկալի անձանց ցուցակում»,- հայտարարել էր Ադրբեջանի ԱԳՆ այն ժամանակվա մամուլի խոսնակ Հիքմեթ Հաջիևը։
Գաբարդը նաև դատարպարտել է Ադրբեջանի ագրեսիան ու մեղադրել Թուրքիային 2020 թվականին Արցախյան 44-օրյա պատերազմը հրահրելու և խրախուսելու մեջ։
2019 թվականին Գաբարդը ԱՄՆ մի քանի այլ սենատորների և Ներկայացուցիչների պալատի ներկայացուցիչների հետ համահովանավորել է Հայոց ցեղասպանության ճանաչման մասին բանաձևը։
Էմմա Չոբանյան
