«Խոսքը պաղեստինցիների ժամանակավոր տեղափոխման մասին է»․ Վաշինգտոնը փորձում է մեղմացնել Գազայի վերաբերյալ Թրամփի շոկային ծրագիրը

Այն բանից հետո, երբ Գազայի հատվածի ապագայի վերաբերյալ ԱՄՆ նախագահ Դոնալդ Թրամփի առաջարկները բուռն մերժում առաջացրեցին  ամբողջ աշխարհում, Վաշինգտոնի վարչակազմը փորձում է մեղմել նրա հայտարարությունները և հստակեցնել դիրքորոշումը, գրում է DW-ի ռուսական ծառայությունը։

Արաբական երկրներում պաղեստինցիներին վերաբնակեցնելու՝ Թրամփի մեկնաբանությունները թշնամական չէին, Գվատեմալա կատարած այցի ժամանակ հայտարարել է ԱՄՆ պետքարտուղար Մարկո Ռուբիոն։ Նա նշել է, որ խոսքը միայն «տների, ձեռնարկությունների և նման բաների վերականգնման մասին է եղել, որպեսզի մարդիկ կարողանան վերադառնալ Գազայի հատված»։

«Կարծում եմ, որ դա շատ առատաձեռն քայլ էր՝ առաջարկել վերակառուցել և պատասխանատվություն ստանձնել վերակառուցման համար»,- ասել է Ռուբիոն։

Սպիտակ տան մամուլի քարտուղար Քերոլայն Լևիթը, պարզաբանելով Թրամփի մեկնաբանությունները, նշել է, թե ԱՄՆ նախագահը նկատի է ունեցել Գազայից պաղեստինցիների «ժամանակավոր տեղափոխումը», ոչ թե արաբական երկրներում նրանց մշտական ​​վերաբնակեցումը։

Ըստ Լևիթի՝ Թրամփն ակնկալում է, որ տարածաշրջանում ԱՄՆ գործընկերները, հատկապես՝ Եգիպտոսը և Հորդանանը, «ժամանակավորապես կընդունեն պաղեստինցի փախստականներին, որպեսզի կարողանան վերակառուցել նրանց տները», քանի որ Գազան այժմ բնակության համար ոչ պիտանի վայր է «ցանկացած մարդու համար»։

Բացի այդ, Լևիթը նշել է, որ Գազայի հատվածի վերականգնման համար ԱՄՆ-ը չի վճարի, և որ ամերիկյան զորքերը, հավանաբար, այնտեղ չեն ուղարկվի: Նա նշել է, որ Թրամփը նկատի է ունեցել, որ Միացյալ Նահանգները կմասնակցի ավերված տարածքների վերականգնմանն ուղղված ջանքերին՝ ամբողջ տարածաշրջանի բնակիչների համար կայունություն ապահովելու նպատակով, բայց դա չի նշանակում, որ ամերիկացի զինվորները կլինեն Գազայում, և որ ամերիկացի հարկատուները կֆինանսավորեն այդ ջանքերը։

Միաժամանակ, Պենտագոնի ղեկավար Փիթ Հեգսեթը, պատասխանելով Գազայի հատված զորքեր ուղարկելու հնարավորության մասին հարցին, նշել է, որ իր գերատեսչությունը պատրաստ է ցանկացած սցենարի։

«Մենք անհաբերությամբ սպասում ենք հնարավորությանը՝ աշխատելու մեր դաշնակիցների, գործընկերների հետ, ինչպես դիվանագիտական, այնպես էլ ռազմական առումով, դիտարկելու բոլոր տարբերակները»,- ասել է նա լրագրողներին Պենտագոնում Իսրայելի վարչապետ Բենիամին Նեթանյահուի հետ հանդիպման ժամանակ։

Հիշեցնենք, որ Թրամփն առաջարկել էր Գազան հանձնել ԱՄՆ-ի վերահսկողությանը, իսկ պաղեստինցիներին՝ հեռանալ այնտեղից։

Թարգմանությունը՝ էմմա Չոբանյանի