ՌԴ-ն բաց է Զելենսկիի հետ բանակցությունների համար՝ «չնայած նրա ոչ լեգիտիմությանը»․ Պեսկով

Ռուսական կողմը պատրաստ է բանակցել Ուկրաինայի ղեկավար Վլադիմիր Զելենսկիի հետ՝ չնայած լեգիտիմության առումով նրա «դե յուրե խնդիրներին»։ Այս մասին ճեպազրույցում հայտարարել է ՌԴ նախագահի մամուլի քարտուղար Դմիտրի Պեսկովը։

«Մեր երկրի վերլուծությունը, որը բազմիցս հնչեցրել է նախագահ Պուտինը, հուշում է, որ պարոն Զելենսկին դե յուրե լուրջ խնդիրներ ունի իր լեգիտիմության առումով, բայց չնայած դրան՝ ռուսական կողմը բաց է մնում բանակցությունների համար»,- ասել է Կրեմլի պաշտոնական ներկայացուցիչը, փոխանցում է ՏԱՍՍ-ը:

Նախօրեին ՌԴ ԱԳՆ-ն հայտարարել էր, որ Մոսկվան պատրաստ է ուկրաինական կարգավորման շուրջ լուրջ քննարկման։ Ըստ ՌԴ ԱԳՆ ԱՊՀ երկրների երկրորդ վարչության պետ Ալեքսեյ Պոլիշչուկի՝ դրա համար անհրաժեշտ է լուծել երկու խնդիր՝ Ուկրաինայի նախագահ Վլադիմիր Զելենսկիի լեգիտիմությունը և ՌԴ նախագահ Վլադիմիր Պուտինի հետ բանակցություններն արգելող նրա հրամանագիրը։

Զելենսկիի հնգամյա ժամկետը պաշտոնապես ավարտվել է 2024 թվականի մայիսի 20-ին։ Նա շարունակում է զբաղեցնել նախագահի պաշտոնը՝ վկայակոչելով երկրում ռազմական դրությունը։ Մայիսի 28-ին ՌԴ նախագահ Վլադիմիր Պուտինը հայտարարել է, որ «նախնական գնահատականի» համաձայն՝ մայիսի 20-ից հետո Ուկրաինայում միակ օրինական իշխանությունը Գերագույն Ռադան է և նրա խոսնակը։ Այս պաշտոնը ներկայում զբաղեցնում է Ռուսլան Ստեֆանչուկը։

2022 թվականի սեպտեմբերի 30-ին Վլադիմիր Զելենսկին հրամանագիր է ստորագրել Վլադիմիր Պուտինի հետ բանակցություններ վարելու անհնարինության մասին։ Ռուսաստանի նախագահը հետագայում մի քանի անգամ ուշադրություն է հրավիրել այս փաստաթղթի վրա՝ նշելով, որ այն խոչընդոտում է բանակցությունների ընթացքին։

Թարգմանությունը՝ Տաթև Ֆռանգյանի