10.08.2026 | 11:19
Արամ Վարդևանյանին ԱԺ փոխնախագահ ընտրելու քվեարկությունը սկսվեց. ՈՒՂԻՂ
Հունաստանը բողոք է հայտնել Ֆրանսիային՝ Թուրքիային Meteor հրթիռներ վաճառելու ծրագրերի կապակցությամբ
Քաղաքականություն
30.01.2025 | 18:32
Հունաստանն իր մտահոգությունն է հայտնել Ֆրանսիային՝ կապված Թուրքիային «օդ-օդ» հրթիռների հնարավոր վաճառքի հետ, քայլ, որը կարող է փոխել ուժերի հավասարակշռությունը Էգեյան ծովում: Հունաստանի պաշտպանության նախարար Նիկոս Դենդիասը Աթենքում Ֆրանսիայի դեսպանի հետ հանդիպմանը դեմ է արտահայտնվել վաճառքին, գրում է Greek Reporter-ը։
Նա փոխանցել է, որ Հունաստանը «վճռականորեն դեմ է նման հնարավորությանը, որը չի համապատասխանում մինչ այժմ երկու երկրների միջև առկա հիանալի ռազմավարական հարաբերություններին»։ Դենդիասը նաև անդրադարձել է 2021 թվականին ստորագրված հույն-ֆրանսիական պաշտպանական համաձայնագրի դրույթներին, որտեղ ասվում է, որ «Հունաստանը և Ֆրանսիան խորհրդակցում են միմյանց հետ բոլոր մակարդակներում՝ նպատակ ունենալով ընդհանուր ըմբռնում ձևավորել բոլոր կարևոր որոշումների շուրջ, որոնք շոշափում են իրենց ընդհանուր շահերը պաշտպանություն ոլորտում և, հնարավորության դեպքում, համատեղ գործողություններ ձեռնարկում»:
Ըստ այս համաձայնագրի՝ յուրաքանչյուր երկիր պարտավորվում է հարձակման դեպքում օգնություն ցուցաբերել մյուսին։ Այս համաձայնագիրը ներառում է ռազմական օգնության հնարավորությունը, ինչը նշանակալի քայլ է Ֆրանսիայի և Հունաստանի միջև անվտանգության ոլորտում համագործակցության մեջ։
Հունաստանը մեծ հետաքրքրություն է ցուցաբերել ֆրանսիական արտադրության ռազմական տեխնիկա ձեռք բերելու հարցում։ Դա ներառում է Rafale կործանիչների և Belharra ֆրեգատների գնումը Հունաստանի նավատորմի համար:
Meteor-ը եվրոպական «օդ-օդ» հրթիռ է, որը մշակվել և արտադրվել է MBDA-ի կողմից: Ռազմական վերլուծաբանները նշում են, որ հրթիռը համարվում է «խաղը փոխող» օդային գերազանցության տեսանկյունից՝ մի շարք առավելություններ տալով մրցակիցների նկատմամբ:
Meteor հրթիռը ծառայության է անցել Շվեդիայի ռազմաօդային ուժերում 2016 թվականին և դրանից հետո ընդունվել է մի շարք այլ երկրների կողմից, այդ թվում՝ Մեծ Բրիտանիայի, Գերմանիայի, Իտալիայի, Իսպանիայի և Ֆրանսիայի: Այն տարբեր զորավարժությունների և գործողությունների ժամանակ ցուցադրել է իր արդյունավետությունն ու հուսալիությունը։
Թարգմանությունը՝ Էմմա Չոբանյանի
