Պուտինը վախենում է բանակցություններից և ամեն ինչ անում է՝ պատերազմը երկարացնելու համար. Զելենսկի

Ուկրաինայի նախագահ Վլադիմիր Զելենսկին անդրադարձել  է ՌԴ նախագահ Վլադիմիր Պուտինի հայտարարությանը, որ ինքն իրավունք չունի ստորագրել վերջնական խաղաղության պայմանագիրը, քանի որ Ուկրաինայի «լեգիտիմ» նախագահը չէ։

«Պուտինն այսօր ևս մեկ անգամ հաստատեց, որ վախենում է բանակցություններից, վախենում է ուժեղ առաջնորդներից և անում է հնարավորը՝ պատերազմը երկարացնելու համար։ Նրա յուրաքանչյուր քայլը և բոլոր ցինիկ հնարքները միտված են պատերազմն անվերջ դարձնելուն»,- գրել է Զելենսկին X-ի իր միկրոբլոգում։

Նա նշել է, որ 2014 թվականին Ռուսաստանը հիբրիդային պատերազմ է սկսել Ուկրաինայի դեմ, որը վերածել է լայնամասշտաբ ներխուժման 2022 թվականին:

«Այժմ իրական խաղաղության հասնելու հնարավորություն կա, բայց հենց Պուտինն է անում ամեն ինչ՝ կա՛մ շարունակելու լայնածավալ սպանությունները, կա՛մ դադար ապահովելու հիբրիդային հարձակումները շարունակելու համար՝ նախապատրաստվելով հերթական լայնածավալ ներխուժման»,- ընդգծել է Ուկրաինայի նախագահը։

Ըստ նրա՝ համաշխարհային առաջնորդները պետք է հաշվի առնեն նախորդ տարիների սխալները, ինչպես նաև այն առաջնորդների սխալները, որոնք այլևս թատերաբեմում չեն։ Պուտինն ունի գլոբալ կայունությունը խաթարելու զգալի հնարավորություններ, բայց նա չափազանց թույլ է ուժեղ առաջնորդների իրական ճնշմանը դիմակայելու համար, ասել է նա:

«Դրա համար մենք պետք է վճռական գործենք ու միասնաբար, բոլոր նրանք, որոնք քաջություն ունեն հավատալու խաղաղությանը և ուժի միջոցով մոտեցնելու այն: Իսկական խաղաղությունը հնարավոր է, եթե Ռուսաստանին պարտադրեն դա»,- նշել է Զելենսկին։

Թարգմանությունը՝ Էմմա Չոբանյանի