Քաղաքականություն
24.01.2025 | 22:26
Ռուսաստանին հաջողվել է գողանալ գերձայնային հրթիռի դիզայնը, որը մշակվում էր ԱՄՆ-ում, հայտարարել է Դոնալդ Թրամփը։ ԱՄՆ նախագահի խոսքով՝ դա տեղի է ունեցել 2009-ից 2017 թվականներին, երբ Բարաք Օբաման Սպիտակ տանն էր։
«Ռուսաստանը գողացել է նախագիծը, այն ստացել են մեզանից։ Ինչ-որ վատ մարդ նրանց գերձայնային [հրթիռի] նախագիծն է տվել»,- ասել է Թրամփը Fox News-ին տված հարցազրույցում։
Այնուամենայնիվ, նա վստահեցրել է, որ ԱՄՆ-ը դեռ կունենա իր սեփական «գերձայնային» հրթիռները, որոնք «նույնիսկ մեկ քայլ ավելի լավը կլինեն», քան նրանք, որոնց գծագրերը գողացել են Ռուսաստանի ներկայացուցիչները։
Թրամփը խոստացել է, որ դրանց ստեղծման աշխատանքները կսկսվեն «շատ շուտով»: Նա նաև նշել է, որ ապագա պատերազմները չեն մղվելու մարտի դաշտում, այլ օդում, այդ իսկ պատճառով անօդաչու սարքերը շատ կարևոր են։
Սա առաջին դեպքը չէ, երբ Թրամփը մեղադրում է Ռուսաստանին գերձայնային հրթիռի դիզայնը գողանալու մեջ։ 2020 թվականին նա ասել է, որ Մոսկվան «ունի սուպեր-պուպեր-գերձայնային հրթիռ, որը հինգ անգամ ավելի արագ է ընթանում, քան սովորական հրթիռը»: Այն ժամանակ նա նաև պնդել է, որ Ռուսաստանը տեղեկություններ է ստացել իրադարձությունների մասին Օբամայի վարչակազմի օրոք։
Թարգմանությունը՝ Տաթև Ֆռանգյանի
