Էրդողանը հայտարարել է, թե Թուրքիան ունակ է «ջախջախելու» բոլոր ահաբեկիչներին և կոչ արել «ձեռքերը հեռացնել» Սիրիայից

Թուրքիայի նախագահ Ռեջեփ Թայիփ Էրդողանը նախազգուշացրել է, որ Անկարան ուժ և կարողություն ունի «ջախջախելու» բոլոր ահաբեկիչներին Սիրիայում, այդ թվում՝ ԻԼԻՊ-ին և քուրդ զինյալներին, միաժամանակ, կոչ անելով բոլոր երկրներին «ձեռքերը հեռացնել» Սիրիայից, գրում է Al Arabiya-ն։

Անցյալ ամիս Բաշար Ասադի տապալումից ի վեր Թուրքիան բազմիցս ասել է, որ քրդական YPG-ի կազմաքանդման ժամանակն է: Անկարան խմբավորումը, որը գլխավորում է ԱՄՆ-ի դաշնակից «Սիրիայի դեմոկրատական ​​ուժերը» (SDF), ահաբեկչական կազմակերպություն է համարում։

Անկարան նաև սպառնացել է նոր անդրսահմանային գործողություն իրականացնել Սիրիայի հյուսիս-արևելքում տեղակայված ուժերի դեմ, եթե իր պահանջները չկատարվեն:

Ելույթ ունենալով խորհրդարանում՝ Էրդողանն ասել է, որ YPG-ն այժմ ամենամեծ խնդիրն է Սիրիայում և հավելել, որ խմբավորումը չի կարողանա խուսափել իր անխուսափելի վախճանից, եթե չդնի զենքերը:

«Ինչ վերաբերում է հորինված պատրվակներին, ինչպիսին է ԻԼԻՊ-ը, դրանք այլևս համոզիչ կողմ չունեն։ Եթե Սիրիայում և տարածաշրջանում իսկապես վախ կա սպառնալիքից, ամենամեծ ուժը, որն ունի կամք և ուժ այս հարցը լուծելու համար, Թուրքիան է։ Բոլորը պետք է իրենց ձեռքերը հեռացնեն Սիրիայից, և մենք մեր սիրիացի եղբայրների ու քույրերի հետ կարճ ժամանակում կջախջախենք ԻԼԻՊ-ի, YPG-ի և այլ ահաբեկչական կազմակերպությունների ղեկավարներին»,- ասել է Էրդողանը՝ նկատի ունենալով ԱՄՆ-ի դիրքորոշումը, որ YPG-ն առանցքային գործընկերն է համարում ԻԼԻՊ-ի դեմ Սիրիայում, և որ այն կարևոր դեր է խաղում ծայրահեղական զինյալների բանտային ճամբարները պահպանելու գործում:

Թարգմանությունը՝ Էմմա Չոբանյանի