ԻԼԻՊ-ը ծրագրել է սպանել Էրդողանի կուսակցության նահանգային ղեկավարին

ԻԼԻՊ-ի զինյալները, ենթադրաբար, ծրագրել են սպանել Թուրքիայի նախագահ Ռեջեփ Թայիփ Էրդողանի «Արդարություն և զարգացում» կուսակցության (AKP) նահանգային ղեկավարին։ Այս մասին հայտնում է Artı Gerçek լրատվական կայքը՝ վկայակոչելով պաշտոնական փաստաթղթերը, գրում է Turkish Minute-ը։

Հաղորդվում է, որ դավադրությունը բացահայտվել է հոկտեմբերին հարավային Ադանա, Դիարբեքիր և Իսքենդերուն քաղաքներում, ինչպես նաև մայրաքաղաք Անկարայում հակաահաբեկչական գործողությունների ժամանակ, որտեղ թուրքական իշխանություններն առգրավել են զենք, զինամթերք և այլ նյութեր, այդ թվում՝ ոստիկանական և զինվորական համազգեստներ, որոնք, ենթադրաբար, օգտագործվելու էին քողարկման համար ապագա հարձակումների ժամանակ:

Թուրքական իշխանությունները պնդում են, որ զինված անձինք մտադիր են եղել օգտագործել խլացուցիչ հրազեն՝ հատուկ թիրախավորելու ԱԶԿ-ի ղեկավարին, ում անունը չի նշվում՝ անվտանգության նկատառումներից ելնելով:

Հոկտեմբերյան գործողությունների թիրախում են եղել ԻԼԻՊ-ի հետ կապ ունեցող անձինք: Հաղորդվում է, որ խուզարկությունների ընթացքում առգրավվել են հրազեն, խլացուցիչներ, պայթուցիկներ և քարոզչական նյութեր:

Թուրքիայում վերջին տարիներին նկատվում է ԻԼԻՊ-ի հետ կապված գործողությունների և ձերբակալությունների աճ: Միայն 2024 թվականին Թուրքիայի իշխանությունները, ըստ պաշտոնական տվյալների, 1399 հակաահաբեկչական գործողություն են իրականացրել ԻԼԻՊ-ի դեմ՝ ձերբակալելով հարյուրավոր կասկածյալների։ Իշխանությունները նշում են, որ այս գործողությունների ընթացքում հայտնաբերել են զենքի, պայթուցիկ նյութերի զգալի պաշարներ և կազմակերպչական նյութեր։

Թարգմանությունը՝ Էմմա Չոբանյանի