Վրաստանի վարչապետը նախագահ Զուրաբիշվիլիին կրկին բանտարկությամբ է սպառնացել

Վրաստանի վարչապետ Իրակլի Կոբախիձեն չափազանց փոքր է համարում հավանականությունը, որ իշխանությունները ստիպված կլինեն գործող նախագահ Սալոմե Զուրաբիշվիլիին հեռացնել Օրբելիանիի պալատից՝ ընտրված նախագահ Միխեիլ Ղավելաշվիլիի երդմնակալությունից հետո, ում լեգիտիմությունը չեն ճանաչում ո՛չ գործող նախագահը, ո՛չ էլ ընդդիմությունը։

Այդուհանդերձ, Իրակլի Կոբախիձեն չի բացառում իրադարձությունների նման զարգացումը՝ ընդգծելով, որ այս դեպքում Սալոմե Զուրաբիշվիլիին կարող է քրեական պատիժ սպառնալ, գրում է Էխո Կավկազան։

«Կարծում եմ, որ այս դեպքում Սալոմե Զուրաբիշվիլին խելամիտ կվարվի։ Հիշեցնեմ, որ սա չի կարող լինել Մելիայի սցենարի կրկնությունը (2021թ. Ազգային շարժման նախկին առաջնորդ Նիկա Մելիային կալանավորել էին կուսակցության գրասենյակում): Դա կուսակցական գրասենյակ չէ, դա Վրաստանի նախագահի նստավայրն է, ուստի նույն սցենարն այնտեղ խաղալը նշանակում է քրեական հանցագործություն կատարել, որը երկար տարիների ազատազրկում է նախատեսում ոչ միայն ուղղակիորեն Սալոմե Զուրաբիշվիլիի, այլև ցանկացած անձի համար, ով ներգրավված կլինի այդ սցենարում: Ես չեմ կարծում, որ Սալոմե Զուրաբիշվիլին կզոհաբերի առաջին հերթին իրեն, ինչպես նաև 100-150 մարդու, ովքեր կարող են կապված լինել իր հետ։ Ուստի ես չեմ սպասում, որ նման անհիմն սցենար կզարգանա»,- լրագրողներին ասել է Կոբախիձեն։

Հիշեցնենք, որ Միխեիլ Ղավելաշվիլիի երդմնակալության արարողությունը նախանշված է դեկտեմբերի 29-ին Վրաստանի խորհրդարանի շենքում։ Արարողությանը հրավիրված չեն գործող նախագահը, ընդդիմության ներկայացուցիչները, անգամ երկրում հավատարմագրված օտարերկրյա դիվանագետներ։

Թարգմանությունը՝ Տաթև Ֆռանգյանի