30.04.2026 | 20:48
Մեր ազգն այժմ պետք է կենտրոնանա ներկայի և ապագայի վրա, այլ ոչ թե մնա անցյալում. Արարատ Միրզոյանի հարցազրույցը France 24-ին
Անկարան ուսումնասիրում է Կատարի գազը Սիրիայով դեպի Թուրքիա ու Եվրոպա մատակարարումների նախագիծը
Քաղաքականություն
27.12.2024 | 21:04
Անկարան գնահատում է Կատարի բնական գազը Սիրիայի տարածքով Թուրքիա, այնուհետև Եվրոպա փոխադրելու հնարավոր նախագիծը։ Այս մասին հայտարարել է երկրի էներգետիկայի և բնական պաշարների նախարար Ալփարսլան Բայրաքթարը, գրում է Turkiye today-ը:
«Շարունակվում են Կատարի գազը Սիրիայի տարածքով Թուրքիա և Եվրոպա տեղափոխելու շուրջ քննարկումները։ Այս ծրագրերը դեռ վաղ փուլում են և պահանջում են հետագա տեխնիկական ու ֆինանսական գնահատում»,- ասել է Բայրաքթարը։
Նա նշել է, որ առաջարկվող գազատարը կարող է նշանակալից էներգետիկ միջանցք ձևավորել՝ ամրապնդելով տարածաշրջանային էներգետիկ անվտանգությունը և դիվերսիֆիկացնելով մատակարարման ուղիները Եվրոպայի համար։ Բայրաքթարը հայտարարել է նաև, որ նախատեսում են կիսել հնարավոր ներդրումները գործընկերների հետ։
«Նախագծերը, ինչպիսիք են սիրիական նավթամուղի ինտեգրումը Իրաք-Թուրքիա խողովակաշարին և Կատարի գազը Սիրիայի տարածքով Թուրքիա և Եվրոպա փոխադրելը, դեռ վաղ փուլում են: Ինչպես մենք Գաբարի նավթը տեղափոխում ենք Իդիլ 38 կիլոմետր երկարությամբ խողովակաշարով, այստեղ էլ կարող ենք նմանատիպ մոդել կիրառել»,- ասել է պաշտոնյան։
Թուրքիան պատրաստվում է նաև էներգետիկ պատվիրակություն ուղարկել Սիրիա՝ աջակցելու պատերազմից վնասված էներգետիկ ենթակառուցվածքի վերականգնմանը։
Կատար-Թուրքիա խողովակաշարի առաջարկը նպատակ ուներ Իրան-Կատարի Հարավային Պարս/Հյուսիսային գմբեթ գազային կոնդենսատային հանքավայրից բնական գազ մատակարարել Թուրքիա, որտեղ այն կարող է միանալ Nabucco խողովակաշարին՝ եվրոպացի սպառողներին մատակարարելու համար: Դեպի Թուրքիա առաջարկվող ուղիներից մեկն անցնում էր Սաուդյան Արաբիայի, Հորդանանի և Սիրիայի տարածքով, իսկ մյուսը՝ Սաուդյան Արաբիայի, Քուվեյթի և Իրաքի։
Ենթադրվում է, որ Սիրիայի նախկին նախագահ Բաշար Ասադը 2009 թվականին հրաժարվել է Կատարի հետ առաջարկվող համաձայնագրի ստորագրումից: Այդ համաձայնագիրը թույլ կտար, որ գազատարը շրջանցի Ռուսաստանը՝ ուղղակիորեն գազ մատակարարելով Եվրոպային:
Թարգմանությունը՝ Էմմա Չոբանյանի
