Զելենսկին ընդունել է Դոնբասը և Ղրիմը ռազմական ճանապարհով վերադարձնելու անհնարինությունը

Ուկրաինական բանակն ուժ չունի վերադարձնելու Դոնբասը և Ղրիմը, որը գրավել էր Ռուսաստանը, սակայն Կիևը չի կարող հրաժարվել այդ տարածքներից, հայտարարել է Ուկրաինայի նախագահ Վլադիմիր Զելենսկին։
«Ուկրաինայի Սահմանադրությունն արգելում է մեզ դա անել։ Դե ֆակտո այս տարածքներն այժմ վերահսկվում են ռուսների կողմից։ Մենք ուժ չունենք դրանք հետ բերելու։ Մենք կարող ենք հույս դնել միայն միջազգային հանրության դիվանագիտական ճնշման վրա՝ ստիպելու [Ռուսաստանի նախագահ Վլադիմիր] Պուտինին նստել բանակցությունների սեղանի շուրջ»,- ասել է Զելենսկին ֆրանսիական Le Parisien թերթին տված հարցազրույցում։

Միևնույն ժամանակ, այն հարցին, թե պատրաստ է արդյոք խաղաղ երկխոսություն սկսել Պուտինի հետ, Զելենսկին ասել է, որ կարևոր չէ, թե ով է նստած իր դիմաց, «կարևորն այն է, թե դու ինչ վիճակում ես»։ «Չեմ կարծում, որ մենք թույլ դիրքերում ենք, բայց մենք նույնպես ուժեղ դիրքերում չենք:
Կլինե՞նք ՆԱՏՕ-ում։ Մենք չգիտենք։ Կլինե՞նք արդյոք Եվրամիության մաս։ Այո՛, ապագայում, բայց ե՞րբ: – ասել է Ուկրաինայի նախագահը։ Նրա խոսքով՝ Պուտինի հետ բանակցություններ սկսելը նման պայմաններում նշանակում է «իրավունք տալ նրան որոշել ամեն ինչ աշխարհի մեր մասում»։
Հետևաբար, Զելենսկին կոչ է արել նախ մշակել «գործողությունների ծրագիր կամ խաղաղության ծրագիր», որը կարող է ներկայացվել Պուտինին «կամ, ավելի լայն իմաստով, ռուսներին»:
Միևնույն ժամանակ, Ուկրաինայի ղեկավարը հավելել է, որ աշխարհի ոչ մի առաջնորդ «իրավունք չունի բանակցել Պուտինի հետ առանց Ուկրաինայի»։
«Մենք այս մանդատը ոչ մեկին չենք պատվիրակել։ «Մենք զոհ ենք», – ընդգծել է Զելենսկին։ Նա հիշատակել է ԱՄՆ նորընտիր նախագահ Դոնալդ Թրամփին, որը ցանկանում է արագ գործել՝ պատերազմն ավարտելու համար։ Սակայն, ըստ Զելենսկիի, Թրամփը դեռ Սպիտակ տանը չէ և չունի ռազմական հակամարտության մասին բոլոր տեղեկությունները՝ եզրակացություններ անելու համար։ Ուկրաինայի նախագահը նաև վտանգավոր է անվանել Ռուսաստանի հետ բանակցություններ սկսելու համար ռազմական գործողությունների «սառեցումը»։ Զելենսկին նաև հույս է հայտնել, որ Թրամփի իշխանության օրոք ԱՄՆ-ը կշարունակի աջակցել Ուկրաինային և կավելացնի ռազմական օգնությունը։

Թարգմանությունը՝ Տաթև Ֆռանգյանի