Քաղաքականություն
18.12.2024 | 21:25
Աբխազիան Ռուսաստանին խնդրում է 2025 թվականին անվճար 327 միլիոն կվտ/ժամ էլեկտրաէներգիա մատակարարել։ Այս մասին հայտարարել է հանրապետության էներգետիկայի և տրանսպորտի նախարարի պաշտոնակատար Ջանսուխ Նանբան, փոխանցում է Գազետան։
«Դեռ հոկտեմբերին Աբխազիան Ռուսաստանի Դաշնությունից 2025 թվականի համար 327 միլիոն կիլովատ/ժամի չափով սոցիալական էլեկտրաէներգիայի փոխանցում էր խնդրել։ Այս հարցով բոլոր տեխնիկական ընթացակարգերը մեր կողմից ավարտվել են, համապատասխան դիմումներն ուղարկվել են ՌԴ էներգետիկայի նախարարություն»,- ասել է նա։
Միաժամանակ Նանբան պարզաբանել է, որ հանրապետության իշխանությունները դեռ պատասխան չեն ստացել Ռուսաստանից։
Ամեն տարի նոյեմբերից ապրիլ ամիսներին Աբխազիան էլեկտրաէներգիայի պակաս է զգում մեծ սպառման պատճառով։ Էներգիայի դեֆիցիտը ծածկելու համար Աբխազիան այն ներմուծում է Ռուսաստանից։
Հիշեցնենք, որ չճանաչված հանրապետությունում հակառուսական բողոքի ցույցերի ֆոնին ՌԴ-ն դադարեցրել է տնտեսական աջակցությունը, արդյունքում Աբխազիան սոցիալ-տնտեսական և էներգետիկ ճգնաժամ է ապրում, որը պայմանավորված է Ռուսաստանի կողմից աջակցության կրճատմամբ։
Թարգմանությունը՝ Տաթև Ֆռանգյանի
