Քաղաքականություն
17.12.2024 | 17:30
Եվրամիությանն անդամակցությունը Թուրքիայի համար շարունակում է մնալ ռազմավարական նպատակ: Այս մասին հայտարարել է Թուրքիայի նախագահ Ռեջեփ Թայիփ Էրդողանը Անկարայում Եվրահանձնաժողովի նախագահ Ուրսուլա ֆոն դեր Լեյենի հետ համատեղ մամուլի ասուլիսում, գրում է TRT Haber-ը։
«Ակնհայտ է, որ մեր անդամակցությունը զգալի ներդրում կունենա ինչպես միության, այնպես էլ մեր երկրի համար, վերջին զարգացումներն է՛լ ավելի են ամրապնդել Թուրքիայի՝ որպես առանցքային երկրի դիրքերը։ Ես փոխանցեցի, որ մենք ակնկալում ենք, որ նրանք կառաջարկեն նոր տեսլական, որը կամրապնդի Թուրքիայի անդամակցության հեռանկարը։ Եվս մեկ անգամ ընդգծեցի, որ մեր ընդհանուր շահերը չպետք է պատանդ լինեն որոշ անդամների արատավոր օրակարգերին։ Մենք կարող ենք շարունակել մեր համագործակցությունը հաղթող-հաղթող բանաձևով և փոխադարձ հարգանքի հիման վրա։ Այսօր առավել, քան երբևէ, անհրաժեշտ է Թուրքիայի և ԵՄ-ի միջև ավելի ամուր և ինստիտուցիոնալ հարաբերություններ։ Որպես թեկնածու երկիր՝ Թուրքիան հավատարիմ է դրան»,- հայտարարել է Էրդողանը։
Նա հույս է հայտնել, որ ԵՄ առաջիկա գագաթնաժողովի որոշումները կնպաստեն Թուրքիայի ու ԵՄ-ի միջև Մաքսային միության վերականգնմանը, ինչպես նաև Թուրքիայի քաղաքացիների համար վիզային ընթացակարգերի արագացմանը՝ մինչև առանց վիզայի ռեժիմի համաձայնության ձեռքբերում։
Ըստ Էրդողանի՝ այսօր տեղի ունեցած հանդիպմանը Եվրահանձնաժողովի նախագահի հետ մանրամասն քննարկել են Սիրիայում վերջին զարգացումները։
«Թուրքիան ու Եվրամիությունը կիսում են այն տեսակետը, որ անհրաժեշտ է պահպանել Սիրիայի ինքնիշխանությունն ու տարածքային ամբողջականությունը երկրում ներառական կառավարության ձևավորմամբ»,- ասել է Թուրքիայի նախագահը։
Նշելով, որ Դամասկոսում Թուրքիայի դեսպանատունն ավելի քան 12 տարի անց վերագործարկվել է, Էրդողանն ասել է. «Ե՛վ ԻԼԻՊ-ի, և՛ PKK-ի դեմ պայքարն ու դրա ընդարձակումը մեր հանդիպման հիմնական հարցերից մեկն էր։ Թուրքիան միակ երկիրն է և ՆԱՏՕ-ի միակ դաշնակիցը, որը դաշտում հաղթել է երկու ահաբեկչական կազմակերպություններին։ Մենք հաստատ թույլ չենք տա, որ այդ կազմակերպությունները ծաղկեն։ Մեր տարածաշրջանի ապագայում նրանց համար տեղ չկա»։
Թարգմանությունը՝ Էմմա Չոբանյանի
