06.10.2026 | 17:54
Վահագն Խաչատուրյանն ու Գերմանիայի դեսպանը քննարկել են երկկողմ հարաբերությունների զարգացումը
Թուրքիայի և Ադրբեջանի քաղաքացիներով նավը Կերչի նեղուցում հայտնել է աղետի մասին և օգնություն խնդրել
Հասարակություն
16.12.2024 | 16:03
Թուրք նավատիրոջ նավը, որում 13 մարդ կա Ադրբեջանից և Թուրքիայից, հայտնվել է աղետալի իրավիճակում Կերչի նեղուցում, նրանք չեն կարողանում բաց ծով դուրս գալ, ջուրն ու սնունդը վերջանում են։ Այս մասին ՏԱՍՍ-ին հայտնել են Ռուսաստանի ծովագնացների արհմիությունից։
«Lady Fortune նավի անձնակազմը, որը պատկանում է թուրք նավատիրոջ և նավարկում է Սիերա Լեոնեի դրոշի ներքո, մի քանի օր առաջ դուրս է եկել Կերչից, պետք է ուղևորվեն Թուրքիա։ Սակայն ներկայում դա անհնար է։ Ջուրը գրեթե վերջացել է, սպառվում է նաև սնունդը, իսկ նավի տեխնիկական վիճակն ավելի է սրվում բարդ եղանակային պայմանների և այն պատճառով, որ գործատուն անբարեխիղճ է եղել, վեց ամիս աշխատավարձ չի վճարել»,- ասել է արհմիության ներկայացուցիչը։
Նա նշել է, որ նավում կա 13 մարդ․ անձնակազմի անդամներից մեկը Թուրքիայի քաղաքացի է, մյուսները՝ Ադրբեջանի։
«Հիմա Կերչի նեղուցում են, աղետի ազդանշան են ուղարկել, բայց դա կապված է ոչ թե վատ եղանակի, այլ այն բանի հետ, որ սոված են։ Քանի որ անձնակազմը չի կարող կապ հաստատել ծովագնացների միջազգային միության հետ, նրանք դիմել են մեզ»,- պարզաբանել է լրատվամիջոցի զրուցակիցը՝ հավելելով, որ անձնակազմն արդեն դիմել է Տեմրյուկի նավահանգստի նավապետին՝ խնդրելով թույլ տալ մուտք գործել նավահանգիստ և օգնություն ցուցաբերել։
Թարգմանությունը՝ Էմմա Չոբանյանի
