20.04.2026 | 15:27
Ճապոնիայում 7,5 մագնիտուդով երկրաշարժ է տեղի ունեցել, ցունամիի վտանգի մասին է հայտարարվել. ՏԵՍԱՆՅՈՒԹ
Ինչո՞ւ է բուսաբանական այգու երկայնքով քարե պարիսպ կառուցվում․ ահազանգ
Հասարակություն
12.12.2024 | 20:13
«Անտարես» հրատարակչության տնօրեն Արմեն Մարտիրոսյանը ֆեյսբուքյան իր էջում ահազանգել է Երևանի բուսաբանական այգու Ծարավ աղբյուր փողոցին հարող հատվածում պարսպապատման աշխատանքների վերաբերյալ։ Նա դժգոհում է, որ այգու շուրջ շարված բետոնե սյուներն ու քարե պարիսպը փակում են դեպի այգի տեսադաշտը։
«Բուսաբանական այգու ցանկապատ են կառուցում: Տխրեցի, երբ տեսա բետոնե սյուներ են ստեղծում, կարծում էի մետաղյա գեղեցիկ նախշերով ցանկապատ կլինի, և ճաղերի միջով փողոցից այգին կերևա: Հետո ինձ խաբում էի, որ գոնե բետոնե սյուների արանքներում կտեղադրեն ասածս մետաղյա ցանկապատը: Այսօր տեսա, որ սյուների միջև ընկած մասում պատ են շարում: Փակում են, որ այգին չերևա: ՀՀ կառավարություն, Երևանի քաղաքապետարան, ի՞նչ կարիք կա այգին պատել: Ի՞նչ եք թաքցնելու այգու ներսում: Ախր աշխարհի ո՞ր քաղաքակիրթ երկրում եք տեսել, որ այգին պատեն»,- գրել է Մարտիրոսյանը։
Factor TV-ն այսօր արձանագրել է, որ Աճառյան-Ծարավ աղբյուր խաչմերուկի հատվածից սկսվող և այգու ողջ երկայնքով ձգվող բետոնե սյուներ կան տեղադրված, իսկ որոշ հատվածներում արդեն քարե պատ է շարված։
Երևանի քաղաքապետարանի լրատվության վարչությունից Factor.am-ին փոխանցեցին, որ այգու տարածքն ընդգրկված է բարեկարգման աշխատանքների մեջ, որում ներառված է նաև պարստապատումը։
«Նախագծով հաստատված է՝ սյուների մեջտեղում քարեր պետք է շարվեն։ Թե ինչ սկզբունքով է ընտրվել հենց այս եղանակով պարիսպներ կառուցել, չեմ կարող ասել, թեմայից տեղյակ գործընկերոջ հետ չի ստացվում այս պահին կապի դուրս գալ։ Նախկինում ևս այդտեղ քարե շարվածք է եղել»,- հայտնեցին քաղաքապետարանի լրատվության վարչությունից։
Անի Թամրազյան
