25.12.2024 | 22:59
Վթար Երևան-Երասխ ավտոճանապարհին․ կա տուժած
Սիրիայում իրանական ուժեր չեն մնացել, Ասադի տապալումից հետո Թեհրանի հզորությունը չի թուլացել․ ԻՀՊԿ հրամանատար
Քաղաքականություն
10.12.2024 | 18:32
Իրանի Իսլամական հեղափոխության պահապանների կորպուսի (ԻՀՊԿ) հրամանատար Հոսեյն Սալամին հայտարարել է, որ Իսլամական Հանրապետությունը չի թուլացել Սիրիայում իր դաշնակից Բաշար Ասադի տապալումից հետո, գրում է Reuters-ը։
«Մենք չենք թուլացել, Իրանի հզորությունը չի նվազել»,- ասել է Հոսեյն Սալամին խորհրդարանի անդամներին փակ նիստի ընթացքում:
Լրատվամիջոցը գրում է, որ Ասադի հեռանալը խաթարել է Թեհրանի կարողությունը՝ նախագծելու իշխանությունը և պահպանելու իր զինյալ խմբավորումների ազդեցությունը ամբողջ տարածաշրջանում, հատկապես, Լիբանանում իր դաշնակից «Հըզբոլլահ»-ի նկատմամբ, որն անցյալ ամիս համաձայնել է հրադադար կնքել Իսրայելի հետ:
«Սիոնիստական ռեժիմի տապալումն օրակարգից դուրս չի բերվել »,- հայտարարել է Սալամին։
Նա նաև նշել է, որ Սիրիայում իրանական ուժեր չեն մնացել:
Ասադի իշխանության տապալումից հետո Իրանի արտաքին գործերի նախարարությունը կոչ էր արել ազգային երկխոսություն սկսել՝ Սիրիայի հասարակության բոլոր շերտերը ներկայացնող ներառական կառավարություն ձևավորելու համար: Իրանի կառավարության խոսնակ Ֆաթեմեհ Մոհաջերանին կոչ էր արել «հարգել Սիրիայի տարածքային ամբողջականությունը»՝ նշելով, որ սիրիացի ժողովուրդը պետք է որոշի իր ճակատագիրը։
Թարգմանությունը՝ Էմմա Չոբանյանի
