Արևմտյան դեսպանները խոսել են Ադրբեջանում մարդու իրավունքների սարսափելի վիճակի մասին․ Բաքուն նրանց մեղադրել է դատական գործերին միջամտելու մեջ

Ադրբեջանում Եվրամիության, Մեծ Բրիտանիայի, Շվեյցարիայի և ԱՄՆ-ի դեսպանները նշում են երկրում մարդու իրավունքների ապահովման և իրավապաշտպանների դերի կարևորությունը։ Բաքվում Մարդու իրավունքների միջազգային օրվան նվիրված միջցոցառման ժամանակ նրանք ընդգծել են այն ադրբեջանցիների դերակատարման մասին, որոնք պայքարում են մարդու իրավունքների համար, նաև կրկին կոչ արել Ադրբեջանի  իշխանություններին՝ հավատարիմ մնալ մարդու իրավունքների միջազգային պարտավորություններին։

Դիվանագետներն ափսոսանք են հայտնել Ադրբեջանում մարդու իրավունքների սարսափելի իրավիճակի համար: Նշվել է, որ չնայած COP29 կլիմայական համաժողովի հետ կապված սպասելիքներին՝ իրավիճակը շարունակում է վատթարանալ:

Ադրբեջանում ԵՄ դեսպան Պետեր Միխալկոն, մասնավորապես, հայտարարել է, որ համաժողովի ավարտից հետո մարդիկ շարունակում են մնալ բանտերում։

«Վստահ եմ, որ այս սենյակում շատերն ակնկալիքներ ունեին, որ COP29-ը որոշակի դրական արդյունքներ կբերի մարդու իրավունքների ոլորտում՝ ի լրումն կլիմայի վերաբերյալ հաջող բանակցությունների: Այնուամենայնիվ, կլիմայական համաժողովի ավարտից հետո, չնայած բանտարկված ադրբեջանցի լրագրողների, իրավապաշտպանների և քաղաքացիական ակտիվիստների ազատ արձակմանն ուղղված միջազգային բոլոր արշավներին, մենք տեսնում ենք, որ նրանք դեռ բանտում են։ Եվս մեկ անգամ կոչ ենք անում Ադրբեջանի իշխանություններին՝ ազատ արձակել բոլոր նրանց, որոնք ազատազրկված են իրենց հիմնարար իրավունքների իրականացման համար»,- ասել է ԵՄ դեսպանը։

Շվեյցարիայի դեսպան Թոմաս Սթելինն իր հերթին ափսոսանք է հայտնել, որ «վերջին հանդիպումից հետո խոսքի և մամուլի ազատության հետ կապված իրավիճակն է՛լ ավելի է վատթարացել»՝ ներկայացնելով Abzas Media-ի աշխատակիցների անունները, որոնք կալանքի տակ են։

Բաքվում ԱՄՆ դեսպան Մարկ Լիբբին էլ ափսոսանք է հայտնել, որ մարդու իրավունքների և խոսքի ազատության համար պայքարողներից շատերը չեն կարող մասնակցել միջոցառմանը։

«Ես կոչ եմ անում Ադրբեջանի իշխանություններին ազատ արձակել այս և բոլոր մյուս անարդարացի ձերբակալվածներին և կատարել իրենց միջազգային պարտավորությունները մարդու իրավունքների պաշտպանության ոլորտում»,- ընդգծել է դիվանագետը։

Պաշտոնական Բաքուն արձագանքել է այս միջոցառմանը՝ արևմտյան դիվանագետներին քննադատելով իրենց հայտարարությունների համար։

«Մենք կտրականապես մերժում ենք դեկտեմբերի 4-ին Բաքվում կայացած միջոցառման ժամանակ ԱՄՆ-ի, Եվրամիության, Միացյալ Թագավորության և Շվեյցարիայի դեսպանների հայտարարությունները՝ կապված Ադրբեջանում «լրագրողների» և «քաղաքական ակտիվիստների»  ձերբակալությունների մասին պնդումների հետ։ Այս հայտարարությունները բացահայտ փորձ են՝ խարխլելու ադրբեջանական դատական ​​համակարգի անկախությունը»,- ասվում է Ադրբեջանի ԱԳՆ հայտարարության մեջ։

Թարգմանությունը՝ Էմմա Չոբանյանի