Ռոբերտ Քոչարյանն իր ֆինանսական միջոցներով կարող է «վերցնել» որևէ կուսակցություն. Արմեն Բաղդասարյան

ՀՀ երկրորդ նախագահ Ռոբերտ Քոչարյանը «Коммерсантъ» թերթին տված հարցազրույցում ևս մեկ անգամ վերահաստատել է քաղաքականություն վերադառնալու իր ցանկությունը՝ չբացելով սակայն փակագծերը, թե այդ վերադարձն ինչ ձևաչափով կլինի․ «Դա կարող է լինել կուսակցության, շարժման, որոշ կուսակցությունների ակտիվ աջակցության տեսքով, նաև՝ կարող է անձնավորված, կամ ոչ անձնավորված լինել: Կարելի է ասել, որ ես դեռ չեմ կողմնորոշվել»,- նշել է 2-րդ նախագահը։

Քաղաքագետ Արմեն Բաղդասարյանի համոզմամբ՝ Ռոբերտ Քոչարյանն իսկապես դեռևս կողմնորոշված չէ․ «Դրա համար էլ ասում է, որ հնարավոր է այլ կուսակցությունների աջակցության տեսքով իր վերադարձը լինի, քանի որ նա կուսակցական գործունեության փորձ չունի, դրա համար էր նախկինում ասում, որ իր կուսակցությունն իր ժողովուրդն է, հետևաբար հավանական է, որ նա իր ֆինանսական միջոցներն ու մարդկային ռեսուրսներն օգտագործի և ինչպես ասում են «վերցնի» որևէ այլ կուսակցություն»։

Հարցին՝ ո՞ր կուսակցությունը «կվերցնի» Ռոբերտ Քոչարյանը, քաղաքագետը պատասխանեց․ «Ամենայն հավանականությամբ դա կարող է լինել Հայ Յեղափոխական Դաշնակցությունը, իսկ ինչ վերաբերում է «Բարգավաճ Հայաստան» կուսակցությանը, ապա պատկերը ակնհայտ կլինի Երևանի ավագանու ընտրություններից հետո»։

Անդրադառնալով հարցազրույցում հնչեցրած որոշ դիտարկումների՝ ըստ որոնց Ռ․ Քոչարյանը Նիկոլ Փաշինյանին համեմատել է Վենեսուելայի նախկին նախագահ Ուգո Չավեսի հետ, նշել, որ Փաշինյանը գիսաստղ է, որը շատ արագ կայրվի, Արմեն Բաղդասարյանն ասաց․ «Բնականաբար, նման ձևակերպումները կարող են վերաճել փոխադարձ փոխհրաձգության, իսկ ինչ վերաբերում է նրան, որ շեշտել է իր կառավարման փորձն ու հմտությունը, ապա պետք է ասեմ, որ ես իր փոխարեն չէի հպարտանա այդ փորձով, քանի որ ապրիլյան հեղափոխությունը ցույց տվեց, որ կուտակված դժգոհությունները գալիս էին դեռևս նրա ժամանակներից։ Այնպես որ՝ նրա այդ փորձը միշտ չէ, որ հաջող է»։

Արմեն Բաղդասարյանից հետաքրքրվեցինք նաև՝ ինչ է ուզում հասկացնել Ռոբերտ Քոչարյանը, երբ ասում է, որ Պուտինի զանգը լուրջ աջակցություն է իր համար։ «Ռոբերտ Քոչարյանն անընդհատ այդ փաստը շեշտելով ուզում է ասել, որ ունի Ռուսաստանի աջակցությունը, իսկ այդ աջակցությունը հայ հասարակության մի հատվածի համար շատ կարևոր է, և ցավալիորեն մեզանում դեռ կա այն մտայնությունը, որ առանց Ռուսաստանի որևէ բան հնարավոր չէ։ Հիմա այդ մտայնությունը շահարկելով՝ 2-րդ նախագահը փորձում է հասարակության հենց այդ հատվածին ուղղորդել դեպի իր կողմը»,- ասաց քաղաքագետը՝ շեշտելով, որ թեև Քոչարյանը «Коммерсантъ»-ին տված հարցազրույցում իր տեսակետներն առավել կոշտ է արտահայտել, սակայն մինչև վերջ անկեղծ չի եղել․ «Նա չի ներկայացրել քաղաքականություն վերադառնալու իր իրական պատճառը, որն ըստ իս, ինքնապաշտպանությունն է»։

Աղավնի Սուքիասյան