05.08.2026 | 16:07
Սարյան փողոցի ՕՍՏ-ի խինկալիում և տոլմայում մանրէների վտանգավոր չափաբաժին է հայտնաբերվել․ ՍԱՏՄ
Ռոբերտ Քոչարյանի և մյուսների գործով դատական նիստը՝ ՈՒՂԻՂ
Հասարակություն
28.11.2024 | 10:16
Հակակոռուպցիոն դատարանում` նախագահությամբ դատավոր Սարգիս Պետրոսյանի, շարունակվում է Հայաստանի երկրորդ նախագահ Ռոբերտ Քոչարյանի, ՀԱՊԿ նախկին գլխավոր քարտուղար Յուրի Խաչատուրովի, Պաշտպանության նախկին նախարար Սեյրան Օհանյանի և նախկին փոխվարչապետ Արմեն Գևորգյանի գործի քննությունը: Նախորդ դատակակ նիստին դատավորը որոշել է բերման ենթարկել Քոչարյանին, Խաչատուրովին և Օհանյանին` պատճառաբանությամբ, որ նրանք, ծանուցված լինելով, չեն ներկայանում նիստերին: Նրանցից Սեյրան Օհանյանը դատարանին հայտնել էր, որ Ազգային ժողովում ծանրաբեռնվածություն ունի:
Քոչարյանի, Օհանյանի, Խաչատուրովի պաշտպանները նախորդ դատական նիստերի ընթացքում հարց են բարձրացրել նաև, որ իրենց վստահորդները Հակակոռուպցիոն դատարանում քննվող գործով մեղադրյալ չեն և պարտավորություն չունեն դատարան ներկայանալու: Ինչ վերաբերում է Արմեն Գևորգյանին, նա ներկայանում է նիստերին, քանի որ բացի Մարտի 1-ի իրադարձությունների վերաբերյալ դրվագից դատարանում քննվում է նաև ենթադրյալ կաշառքի գործ, որով Արմեն Գևորգյանը մեղադրյալ է:
Հիշեցնենք, որ Վճռաբեկ դատարանը բեկանել է Քոչարյանի և մյուսների նկատմամբ սահմանադրական կարգի տապալման հոդվածը հակասահմանադրական ճանաչելուց հետո Քոչարյանի, Խաչատուրովի, Արմեն Գևորգյանի և Սեյրան Օհանյանի նկատմամբ քրեական հետապնդումը դադարեցնելու և Մարտի 1-ի գործը կարճելու որոշումը և գործն ուղարկել առաջին ատյանի դատարան` նոր քննության:
Արաքս Մամուլյան
