Վրաստանի իշխող կուսակցությունը նախագահի թեկնածու կառաջադրի նախկին ֆուտբոլիստ Միխեիլ Ղավելաշվիլիին

Վրաստանի նախագահի թեկնածուն իշխող կուսակցությունից կլինի նախկին ֆուտբոլիստ Միխեիլ Ղավելաշվիլին։ «Վրացական երազանքն» այսօր առավոտյան քննարկել է նախագահի թեկնածուին նախ՝ քաղխորհրդի նիստի, ապա մեծամասնության մասնակցությամբ նիստի ձևաչափով, գրում է apsny․ge-ն։

«Ազնվությունը, արդարությունը և հայրենասիրությունն այն հատկանիշներն են, որոնք առանձնացնում են Միխեիլ Ղավելաշվիլիին»,- այսպես է բնութագրել նրան «Վրացական երազանքի» պատվավոր նախագահ Բիձինա Իվանիշվիլին։

«Նա իր բնույթով, եթե կուզեք՝ իր սովորությամբ վրացի տղամարդու լավագույն մարմնավորումն է։ Նա հիանալի ամուսին է և չորս երեխաների հայր։ Հաշվի առնելով վերը նշվածը՝ թիմը միաձայն որոշում է կայացրել Վրաստանի նախագահի պաշտոնում Միխեիլ Ղավելաշվիլիի առաջադրման վերաբերյալ։ Վստահ եմ, որ Միխեյիլ Ղավելաշվիլին ամբողջությամբ կվերականգնի նախագահական ինստիտուտից ժամանակավորապես խլված արժանապատվությունը»,- հայտարարել է Իվանիշվիլին։

Կավելաշվիլին ֆուտբոլի վետերան է։ 1980-ականների վերջին նա խաղացել է «Լոկոմոտիվ»-ում և «Դինամո»-ում: 1995 թվականին տեղափոխվել է Վլադիկովկասի «Սպարտակ-Ալանիա» ակումբ, ապա՝ «Մանչեսթեր Սիթի», իսկ ավելի ուշ խաղացել է Շվեյցարիայի տարբեր ակումբներում։

Միխեիլ Ղավելաշվիլին «Ժողովրդի իշխանություն» քաղաքական միավորման առաջնորդներից է, որը բաղկացած է իշխող կուսակցության ներկայացուցիչներից, որոնք պաշտոնապես անջատվել են «Վրացական երազանքից»:

Նախագահը 5 տարի ժամկետով կընտրվի ընտրական կոլեգիայի կողմից, որը բաղկացած է 300 անդամից:

Թարգմանությունը՝ Տաթև Ֆռանգյանի