30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Թուրքիայում 2 ռուս օդաչուներ 5 տարվա ազատազրկման են դատապարտվել
Քաղաքականություն
25.11.2024 | 20:14
Երկու ռուս օդաչուներ հինգ տարվա ազատազրկման են դատապարտվել 2022 թվականին Թուրքիայի Դենիզլի նահանգում հրշեջ ուղղաթիռի կործանման գործում ունեցած դերակատարման համար, որի հետևանքով երկու մարդ էր մահացել, գրում է Turkiye today-ը։
Դենիզլիի 3-րդ բարձր քրեական դատարանը վճիռներում որպես վթարի հիմնական պատճառ նշել է թռիչքների պլանավորման և վառելիքի կառավարման հարցում անփութությունը:
Դատարանը որոշել է, որ օդաչուները՝ Իլյա Իվեսենկոն և Եգոր Տուրկովը, վառելիքի մատակարարում չեն պլանավորել և թռիչքի ընթացքում միջանկյալ վայրէջք չեն կատարել վառելիքի լիցքավորման համար։ Այս անտեսումները հանգեցրել են արտակարգ իրավիճակի, երբ ուղղաթիռի շարժիչներից մեկը խափանվել է, ինչն էլ դարձել է վթարի պատճառ: Տեխնիկական անձնակազմի անդամ Օմեր Քաան Չաքիրը, որը նույնպես անցնում էր գործով, արդարացվել է։
Հիշեցնենք, որ 2022 թվականի սեպտեմբերի 21-ին Մարմարիսում անտառային հրդեհի մարմանն օգնելու նպատակով Կաստամոնուից ուղևորվող հրշեջ ուղղաթիռը վթարի էր ենթարկվել Դենիզլիի Չարդակ շրջանի մոտ: Վթարի հետևանքով զոհվել էին անձնակազմի ռուս անդամներ Ալեքսանդր Յակովլևը և Ալեքսեյ Վոլկովը: Եվս չորս մարդ, այդ թվում՝ երկու թուրքեր տեխնիկական անձնակազմից և անձնակազմի երկու ռուս անդամներ, վնասվածքներ էին ստացել։
Թարգմանությունը՝ Էմմա Չոբանյանի
