11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Մեծ Բրիտանիան և Ֆրանսիան կրկին քննարկում են Ուկրաինա զորք ուղարկելու հարցը
Քաղաքականություն
25.11.2024 | 17:51
Եվրոպական երկրները վերսկսել են Ուկրաինա զորքեր կամ մասնավոր ռազմական ընկերությունների աշխատակիցների ուղարկելու քննարկումները։ Առայժմ խոսքն ուկրաինացի զինվորների պատրաստման, ռազմական նոու-հաուի փոխանցման և տեխնիկայի վերանորոգման մասին է, հայտնում է ֆրանսիական Le Monde պարբերականը՝ վկայակոչելով իրազեկ աղբյուրներին։
Ուկրաինա արևմտյան զորքեր ուղարկելու մասին բանավեճը սկսվել է փետրվարին, երբ Ֆրանսիայի նախագահ Էմանուել Մակրոնը հրապարակավ նման միտք է արտահայտել։ Թեև մի շարք երկրներ, հատկապես՝ Գերմանիան, կտրուկ դեմ են հանդես եկել, այդ գաղափարը չի թաղվել, ավելին՝ վերջին շաբաթներին վերածնվել է, ասվում է հրապարակման մեջ։
Մասնավորապես, այն քննարկվել է նոյեմբերի 11-ին Մեծ Բրիտանիայի վարչապետ Քիր Սթարմերի Ֆրանսիա կատարած այցի ժամանակ։
«Մեծ Բրիտանիայի և Ֆրանսիայի միջև բանակցությունները շարունակվում են պաշտպանական ոլորտում համագործակցության շուրջ, մասնավորապես՝ Եվրոպայում դաշնակիցների ուժեղ խմբավորում ստեղծելու նպատակով՝ կենտրոնացած Ուկրաինայի և, ընդհանրապես, եվրոպական անվտանգության վրա»,- պարբերականին ասել է բրիտանական ռազմական աղբյուրը:
Թարգմանությունը՝ Տաթև Ֆռանգյանի
