07.10.2026 | 23:48
Արթուր Դանիելյանը կալանավորվեց
Թուրքիայի ԶՈՒ-ի գնդապետը դատապարտվել է 44 տարվա ազատազրկման զինվորների նկատմամբ սեռական ոտնձգությունների համար
Քաղաքականություն
22.11.2024 | 21:50
Թուրքիայում դատարանը նոյեմբերի 21-ին Սաքարիայի կայազորի նախկին հրամանատար, գնդապետ Ֆահրի Ջան Չաղլարին դատապարտել է 44 տարվա ազատազրկման իր հրամանատարության տակ գտնվող զինվորների նկատմամբ սեռական ոտնձգություններ կատարելու մեղադրանքների համար, գրում է Duvar-ը։
Նա կալաավորվել էր 2022 թվականին այն բանից հետո, երբ 15 զինվորներ նրա դեմ հայցեր էին ներկայացրել։
Հետաքննությունը սկսվել է 2022 թվականի մարտի 27-ին, երբ մի զինծառայող գնացել է Սաքարիայի ոստիկանական բաժանմունք՝ դեպքի մասին հաղորդում տալու։ Սակայն ավելի ուշ պարզվել է, որ ցուցմունք տալու կանչված զինծառայողը չի ներկայացել դատախազություն։
Դատախազները այնուհետև ուսումնասիրել են երեք այլ զինծառայողների ներկայացրած բողոքները և հարցաքննության են կանչել այլ զինծառայողների ևս։ Ապացույցներ հավաքելուց հետո նա նախ բերման է ենթարկվել, ապա դատարանի կողմից կալանավորվել։
Զինվորների ընտանիքները հաստատել էին մեղադրանքները՝ չհրապարակելով նրանց անուններն անվտանգության նկատառումներից ելնելով։ Դեպքից հետո Էգեյան կայազորի հրամանատարությունը երկու հրամանատարի հանձնարարել էր ներքին զինվորական հետաքննություն անցկացնել։
Ի դեպ, 2015 թ-ին Չաղլարի օգնական Թահա Յափարը ինքնասպան է եղել։ Այն ժամանակ պնդում էին, որ ինքնասպանությունը կարող է կապված լինել բռնության և դրան հաջորդած քողարկման հետ:
Թարգմանությունը ՝Էմմա Չոբանյանի
