Քաղաքականություն
20.11.2024 | 22:44
COP29-ում Եվրախորհրդարանի պատվիրակության ղեկավար Լիդիա Պերեյրան և կլիմայի հարցերով եվրահանձնակատար Վոպկե Հոքստրան ձեռնպահ են մնացել պատասխանել հարցին, թե ինչպես են ընկալում պաշտոնական Բաքվի քննադատությունները եվրոպական ինստիտուտների հասցեին։ Ադրբեջանական լրատվամիջոցների փոխանցմամբ՝ այսօր COP29-ի շրջանակում նրանք հանդես են եկել մամուլի ասուլիսով՝ զեկուցելով կլիմայի փոփոխության դեմ ուղղված նախագծերի իրականացման բանակցությունների և քննարկումների ընթացքի մասին։
BBC-ի թղթակիցը խնդրել է մեկնաբանել պաշտոնական Բաքվի հայտարարությունները, որոնք Եվրախորհրդարանին և Եվրամիությանը մեղադրում են հակաադրբեջանական գործունեության մեջ։ Լրագրողը հարցրել է նաև, թե ԵՄ-ի և Եվրախորհրդարանի ներկայացուցիչները քննարկե՞լ են, արդյոք, մարդու իրավունքների հարցերը Ադրբեջանի իշխանությունների հետ, ինչպես պահանջում են բազմաթիվ միջազգային կազմակերպություններ:
Լիդիա Պերեյրան նշել է, որ իր պատվիրակությունը դեռևս չի հանդիպել պաշտոնյաների հետ: Հանդիպում է լինելու Ադրբեջանի արտաքին հարաբերությունների խորհրդարանական հանձնաժողովի հետ, որտեղ այդ հարցերը կբարձրացվեն։
ԵՄ-ի հասցեին Բաքվի քննադատության առնչությամբ եվրահանձնակատար Հոքստրան ասել է, որ փոխադարձ քննադատությունը մեծ քաղաքականության մի մասն է։ Նրա խոսքով՝ կողմերը կարող են միմյանց նկատմամբ գնահատականներ հայտնել, «որոնց հետ համաձայն չեն, և որոնք իրական չեն»։
Հավելենք, որ Վոպկե Հոքստրան օրերս դատապարտել էր Ադրբեջանի նախագահ Իլհամ Ալիևի՝ Բաքվում COP29 կլիմայական գագաթնաժողովի ժամանակ Նիդերլանդների և Ֆրանսիայի հասցեին հնչեցրած «նեոգաղութատիրության» մեղադրանքները։ Նա «ոչ օգտակար» էր անվանել այդ արտահայտությունները:
Հոքստրան հաստատել է, որ անձամբ է իր դժգոհությունը փոխանցել կլիմայի հարցով ադրբեջանցի բանակցող Վագիֆ Բաբաևին:
«Կան երկարատև երկկողմ վեճեր, մասնավորապես, Բաքվի և Փարիզի միջև։ Բայց այն, ինչ պետք է անի COP-ի նախագահը, մի կողմ թողնի այդ տարաձայնությունները և կենտրոնանա կլիմայի փոփոխության դեմ պայքարի քննարկումների վրա»,- ասել է նա։
Նա հավելել է, որ Ալիևի կողմից գագաթնաժողովի օգտագործումը, հատկապես՝ փոքր կղզի պետությունների առջև ծառացած մարտահրավերներին նվիրված նիստերի ժամանակ, եվրոպական երկրներին քննադատելու համար հակաարդյունավետ էր։
«Նեոգաղութատիրության մեղադրանքները, որոնք ուղղված են Նիդերլանդներին և Ֆրանսիային, բացարձակապես անտեղի են և ոչնչով չեն օգնում առաջընթացին»,- ասել է պաշտոնյան։
Հիշեցնենք, որ Ալիևը COP29-ի ժամանակ ունեցած ելույթում Ֆրանսիայի, Նիդերլանդների ու եվոպական ինստիտուտների հասցեին մի շարք մեղադրանքներ էր հնչեցրել։
Թարգմանությունը՝ Էմմա Չոբանյանի
