11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Ալիևի «հարձակումներն» անպատասխան չեն մնա․ ֆրանսիացի նախարարը հրաժարվել է մասնակցել COP29-ին
Քաղաքականություն
14.11.2024 | 12:17
Ֆրանսիայի շրջակա միջավայրի նախարար Ագնես Պանիե-Ռունաշերը չի մասնակցի Բաքվում անցկացվող կլիմայի փոփոխության COP29 համաժողովին՝ Ադրբեջանի նախագահ Իլհամ Ալիևի «անընդունելի» հարձակումներից հետո։ Այս մասին նախարարը հայտարարել է Սենատում։
«COP29-ի բացման ժամանակ նախագահ Ալիևի՝ Ֆրանսիայի ու Եվրոպայի մասին արված մեկնաբանություններն անընդունելի են։ Ուղղակի հարձակումները մեր երկրի, նրա ինստիտուտների և նրա տարածքների դեմ անհիմն են։ Ադրբեջանն օգտագործում է կլիմայի փոփոխության դեմ պայքարը աղաղակող անձնական օրակարգի համար։ Այս հարձակումները UNFCCC-ի վարքագծի կոպիտ խախտում են, դրանք անպատասխան չեն մնա»,- հայտարարել է Ագնես Պանիե-Ռունաշերը։
Նա հավելել է, որ չի մեկնի Բաքու՝ համաժողովին մասնակցելու։
«Քննարկումներից հետո և համաձայնեցնելով հանրապետության նախագահի ու վարչապետի հետ՝ հաջորդ շաբաթ ես չեմ մեկնի Բաքու։ Ֆրանսիական բանակցային թիմերը ջանք չեն խնայի իմ հեռակա աջակցությամբ և մեր եվրոպացի գործընկերների հետ համատեղ՝ պաշտպանելու մոլորակը և մեր բնակչությանը։ Մենք կշարունակենք պաշտպանել Փարիզի համաձայնագրի կատարման ամենաբարձր մակարդակը դրա կնքումից 10 տարի անց»,- ասել է ֆրանսիացի նախարարը։
Մինչ այդ, հոկտեմբերին Բաքու էր այցելել Ֆրանսիայի էներգետիկայի նախարարը Pre-COP29 համաժողովին։
Հիշեցնենք, որ Ալիևն իր ելույթում Ֆրանսիայի, Նիդերլանդների ու եվրոպական ինստիտուտների մասին մի շարք հայտարարություններ էր արել՝ մեղադրելով հանցագործությունների մեջ։
Թարգմանությունը՝ Էմմա Չոբանյանի
