14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Իլոն Մասկը պաշտոն կստանա․ Թրամփը հրապարակել է նաև ապագա պաշտպանության, ներքին անվտանգության նախարարների և ԿՀՎ տնօրենի անունները
Քաղաքականություն
13.11.2024 | 11:02
ԱՄՆ նորընտիր նախագահ Դոնալդ Թրամփը հրապարակել է ապագա պաշտպանության նախարարի, ներքին անվտանգության նախարարի և ԿՀՎ տնօրենի անունները։ Մասնավորապես, Թրամփը Պենտագոնի ղեկավարի պաշտոնում առաջադրել է Fox News-ի հաղորդավար Փիթ Հեգսեթի թեկնածությունը, հայտնում է Politico-ն։ Իր որոշման մասին հայտարարելիս նորընտիր նախագահը նշել է, որ Հեգսեթը բանակի վետերան է և ծառայել է Աֆղանստանում, Իրաքում և Գուանտանամոյում։ Բացի այդ, նորընտիր նախագահը հայտարարել է, որ գործարարներ Իլոն Մասկը և Վիվեկ Ռամասվամին կգլխավորեն դեպարտամենտը, որը կզբաղվի դաշնային կառավարության աշխատանքի օպտիմալացմամբ, գրում է VOA-ն։
«Փիթի ղեկավարությամբ՝ Ամերիկայի թշնամիները զգուշացված են. մեր բանակը կրկին կդառնա հզոր, և Ամերիկան երբեք չի նահանջի», – ասել է Թրամփը՝ նրան անվանելով «կոշտ, խելացի և «նախ Ամերիկան» սկզբունքին անկեղծորեն հավատացող»:
Թրամփը ներքին անվտանգության նախարարի պաշտոնում առաջադրել է Հարավային Դակոտայի նահանգապետ Քրիստի Նոեմի թեկնածությունը։ Նա ճանաչում ձեռք բերեց այն բանից հետո, երբ հրաժարվեց նահանգում դիմակների ռեժիմ սահմանել COVID-19 համաճարակի ժամանակ, նշում է VOA-ն։
Թրամփը որոշել է Ազգային հետախուզության նախկին տնօրեն Ջոն Ռաթքլիֆին նշանակել Կենտրոնական հետախուզական վարչության (ԿՀՎ) ղեկավար։
Ինչպես գրում է VOA-ն, անսպասելի էր Թրամփի հայտարարությունն այն մասին, որ միլիարդատեր Իլոն Մասկը և գործարար և նախագահի նախկին հանրապետական թեկնածու Վիվեկ Ռամասվամին կգլխավորեն կառավարության արդյունավետության հարցերով զբաղվող նոր ստեղծվող դեպարտամենտը։
Թրամփն արդեն սկսել է ձևավորել իր վարչակազմը։ Պետքարտուղարի պաշտոնում քննարկվում է սենատոր Մարկո Ռուբիոի թեկնածությունը, իսկ Ազգային անվտանգության հարցերով խորհրդական կդառնա Մայք Ուոլցը։ Թրամփը ՄԱԿ-ում ԱՄՆ մշտական ներկայացուցչի պաշտոնն առաջարկել է Ներկայացուցիչների պալատի անդամ Էլիզ Ստեֆանիկին։
Թարգմանությունը՝ Տաթև Ֆռանգյանի
